Լոնդոն-2012. Ֆուտբոլի մրցաշարի 2-րդ տուրի տեսություն

Իսպանացիների վաղաժամ հրաժեշտը, Գիգզի նոր նվաճումը, ռեժիսորների վրիպակը Բրազիլիա-Բելառուս խաղում, մեքսիկացի Ֆաբիանի աղոթքը և շատ ու շատ ավելին Լոնդոնից` օլիմպիական խաղերի ֆուտբոլի մրցաշարի 2-րդ տուրի մեր տեսությունում:

Օլիմպիական խաղերի ֆուտբոլի մրցաշարը, արդեն խմբային փուլի 2-րդ տուրում, տվեց մի քանի կարևոր հարցերի պատասխաններ, միաժամանակ առաջադրելով նոր հարցեր: Գլխավոր պատասխաններից մեկը բացասական էր. Իսպանիան հերթական մրցաշարում հաղթող չի դառնա: Մյուս, թեկուզ անվստահ պատասխանը այն էր, որ` այո, Մեծ Բրիտանիայի հավաքականը որպես ֆուտբոլային թիմ ամեն դեպքում իրավունք ունի գոյություն ունենալ: Իսկ առաջացած հարցերից մեկն այն է, թե կհաջողվի՞ արդյոք Ուրուգվայի հավաքականին դուրս գալ խմբից: Բրազիլիայի հավաքականն էլ աչքի է ընկնում իր «կայուն զորությամբ» և հավանաբար բոլոր հարցերին պատասխանի իր տարբերակը կառաջարկի միայն  օգոստոսի 11-ին` եզրափակիչում:

Գիգզը տոնում է ռեկորդային գոլը

А խումբ
Մեծ Բրիտանիա 3-1 ՄԱԷ
1-0` Գիգզ (16'), 1-1` Էիզա (60'), 2-1` Սինքլեյր (73'), 3-1 Ստարիջ (76'):

Հուլիսի 29-ին ֆուտբոլի մրցաշարը վերջապես հասավ օլիմպիական մայրաքաղաք Լոնդոն: Լեգենդար «Ուեմբլիում» հերթական անգամ հնչեց անգլիական թագուհուն նվիրված տողերով բրիտանական օրհներգը, իհարկե, առանց ուելսցի ֆուտբոլիստների ձայնարկման: Խաղը, ինչպես սպասվում էր, անցավ բրիտանացիների առավելությամբ, սակայն դա չէր խանգարում արաբ ֆուտբոլիստներին մերթընդմերթ վտանգավոր գրոհներ կազմակերպելու: Իսկ բրիտանացիները, ինչպես և առաջին խաղում, կարծես հույսերը դրել էին հենց «երգել չսիրող» ուելսցիների վրա, համենայնդեպս, առջևի գծում ամենաակտիվը հենց Բելամին էր, որի փոխանցումից հետո 38 տարեկան և 243 օրեկան Գիգզը գրավեց դարպասը և դարձավ օլիմպիական խաղերում գոլի հեղինակ դարձած ամենատարեց ֆուտբոլիստը: Ու հենց այդ 38 տարիների ընթացքում կուտակած փորձը ուելսցուն օգնեց հայտնվել ճիշտ պահին ճիշտ տեղում: Ավագի գոլից հետո խաղն առավել հանգստացավ և բրիտանացիները վստահորեն վերահսկում էին խաղը:

Սակայն երկրորդ կեսի 60-րդ րոպեին արաբների գրոհներից մեկն այնուամենայնիվ պսակվեց հաջողությամբ: Էիզան, ընթացքից ստանալով գնդակը, արագությամբ շրջանցեց բրիտանացիների երկու պաշտպաններին և գրավեց դարպասը: Այստեղ վերջապես գործին խառնվեց Սթյուարտ Պիրսը և դաշտ դուրս բերեց Սքոթ Սինքլեյրին: Վերջինս դաշտ մտնելուց մեկ րոպե անց արդեն տոնում էր իր գոլը: Երեք րոպե անց աշխատեց նաև Պիրսի մյուս փոփոխությունը. գոլի հեղինակ դարձավ երկրորդ կեսում դաշտ դուրս եկած Դանիել Ստարիջը: Մեծ Բրիտանիայի հավաքականը կարողացավ ոչ միայն արագորեն դուրս գալ անցանկալի իրավիճակից և հաղթանակ տոնել, այլև դրսևորեց իրեն որպես միանգամայն կառավարելի ֆուտբոլային կոլեկտիվ, աշխատող մեքենա, որը դեռ աճելու է մրցաշարի ընթացքում` հիշեցնելով նաև տանտիրոջ իր կարգավիճակի մասին:

Սենեգալ 2-0 Ուրուգվայ
1-0` Կոնատե (9'), 2-0` Կոնատե (37')

Սենեգալի հավաքականը լուրջ հայտ ներկայացրեց` խմբից դուրս գալու առաջին տեղով: Ուրուգվայի հետ խաղում աֆրիկացիները դաշտ դուրս եկան տանտերերի դեմ ոչ-ոքիից կուտակած մեծ ինքնավստահությամբ, և արդեն 9-րդ րոպեին Կոնատեն բացեց խաղի հաշիվը: Շրջադարձային կարող էր լինել խաղի 30-րդ րոպեն, երբ սենեգալցի ֆուտբոլիստ Աբդուլայե Բան լքեց խաղադաշտը կարմիր քարտը իր գլխավերևում տեսնելուց հետո: Մինչ ուրուգվայցիները փորձում էին հասկանալ, թե ինչպես են օգտագործելու ստացված թվային առավելությունը, սենեգալցիները երկրորդ գնդակը ուղարկեցին նրանց դարպասը: Գոլի հեղինակ դարձավ նույն Կոնատեն և 3 գոլերով առայժմ մրցաշարի լավագույն ռմբարկուներից մեկն է: Խաղի հետագա ընթացքը ոչինչ չտվեց, և ուրուգվայցիների աստղային հարձակումը այդպես էլ չկարողացավ գնդակը հասցնել աֆրիկյան թիմի դարպասը: Արդյունքում` Սենեգալը երկու խաղից հետո ունի 4 միավոր և մնացած միակ հանդիպում համեմատաբար թույլ ՄԱԷ-ի հետ, իսկ ուրուգվայցիները քառորդ եզրափակիչի ուղեգիր կարող են խլել միայն տանտերերի ձեռքից` այն էլ միայն հաղթանակի դեպքում: 

Դոս Սանթոսը անվրեպ է իրացնում 11 մետրանոցը

B խումբ

Մեքսիկա 2-0 Գաբոն

1-0` Դոս Սանթոս (62'), 2-0` Դոս Սանթոս (91', 11մ)

Խաղը սկսվեց մեքսիկացի հարձակվող Մարկ Ֆաբիանի աղոթքով` դաշտի կենտրոնից: Հավանաբար նա աղոթում էր իր խաղընկեր Ջիովաննի դոս Սանթոսի համար, քանի որ վերջինս դուրս եկավ փոխարինման և հեղինակեց մեքսիկացիները երկու գոլերը: Դա թույլ տվեց մեքսիկացիներին խմբից դուրս գալու համար ընդամենը պայքարել շվեյցարացիներին չպարտվելու համար:

Հարավային Կորեա 2-1 Շվեյցարիա

1-0` Պակ Չու Յուն (57'), 1-1` Էմեգարա (59'), 2-1` Կիմ (64')

Երկու թիմերն էլ առաջին տուրում ոչ-ոքիներից հետո խաղադաշտ էին դուրս եկել իրենց առաջին հաղթանակը տոնելու վճռականությամբ: Երկրորդ կեսի 57-59-րդ րոպեներին թիմերը փոխանակվեցին երկու իրար նման գոլերով` խփված գլխի հարվածներով: Իսկ դրանից մի քանի րոպե հետո Կիմը վերջապես հաստատեց իր թիմի առավելությունը` ինչպես այս խաղում, այնպես էլ քառորդ եզրափակիչների ուղեգիրների համար պայքարում: Կորեացիներին մնում է ընդամենը ոչ-ոքի խաղալ գաբոնցիների հետ:

Նեյմարը և Պատոն` բրազիլացիների առաջին գոլից հետո

C խումբ

Բրազիլիա 3-1 Բելառուս

0-1` Բրեսան (8'), 1-1` Պատո (15'), 2-1` Նեյմար (65'), 3-1` Օսկար (90')

Բրազիլացիները ինչպես ողջ մրցաշարում, այնպես էլ այս խաղում, համարվում էին ֆավորիտներ, և դրա հետ ոչ ոք չի վիճում: Այս պարագայում խաղի 8-րդ րոպեին բելառուս ֆուտբոլիստ Բրեսանի խփած գնդակը զարմացրեց բոլորին, այդ թվում հեռուստահեռարձակման ռեժիսորներին, ովքեր բելառուսների գոլից հետո գնդակը սխալմամբ գրանցեցին Բրազիլիայի դիմաց: Կազմակերպիչներին իրենց սխալն ուղղելու համար պահանջվեց 1 րոպե, իսկ բրազիլացիներին` իրենց սխալն ուղղելու համար` 7 րոպե: Նեյմարի հստակ փոխանցումից օգտվեց Պատոն և հավասարեցրեց հաշիվը: Խաղը շարունակվեց տրամաբանական զարգացումներով, և բրազիլացիները հաջողությամբ իրացրեցին իրենց առավելությունը խաղի ընթացքում` վերահաստատելով իրենց հավականությունները ոսկե մեդալի համար պայքարում:

Եգիպտոս 1-1 Նոր Զելանդիա

0-1` Վուդ (17'), 1-1` Սալահ (40')

Նորզելանդացիները դարպասին կատարած իրենց միակ հարվածով 17-րդ րոպեին առաջ անցան հաշվի մեջ: Եգիպտոսը չշտապեց խուճապի մատնվել և աստիճանաբար տիրելով խաղային առավելությանը` առաջին կեսի վերջում հավասարեցրեց հաշիվը: Եգիպտացիներին թվում էր, որ նույն առավելության հաշվին նրանք նույն կերպ շատ հանգիստ հաղթանակ են տոնելու, սակայն երկրորդ գոլը անընդհատ ուշանում էր ողջ երկրորդ կեսի ընթացքում: Այն այդպես էլ տեղի չունեցավ, փոխարենը նորզելանդացիները խաղի վերջնամասում կարող էին հաղթանակ տոնել մի քանի վտանգավոր հակագրոհների արդյունքում: Խաղն այսպես էլ ավարտվեց, և եգիպտացիները բարդացրեցին հաջորդ փուլ դուրս գալու իրենց հնարավորությունը:

Հոնդուրասցի Բենգստոնը տոնում է իսպանացիների դարպասն ուղարկած գնդակը

D խումբ

Իսպանիա 0-1 Հոնդուրաս

0-1` Բենգստոն (7')

Երկրորդ տուրի գլխավոր սենսացիան տեղի ունեցավ «Սենթ Ջեյմս Պարկում»: Այստեղ Հոնդուրասի հավաքականը պայքարից դուրս թողեց իսպանացիներին: Ունենալով երեք Եվրոպայի չեմպիոններ իրենց կազմում, ինչպես նաև ներկայումս աշխարհում ամենաարդյունավետ մարտավարական սխեման, իսպանացիները խաղի սկզբում ընդունած գոլից հետո այդպես էլ չկարողացան արժանի պատասխան տալ մրցակցին: 0 միավոր և 0 խփած գնդակ երկու խաղում`այս ցուցանիշների կողքին իրոք անսովոր է տեսնել իսպանական դրոշը: Առաջին խաղից հետո մեղավորներ կամ պատճառներ գտնել մի կերպ ստացվեց, իսկ հիմա արդեն Լուիս Միլլային ոչ ոք լսել չի ուզում: Իսկ հոնդուրասցիները, հավանաբար, ճապոնացիների հետ կանցնեն հաջորդ փուլ: 

Ճապոնիա 1-0 Մարոկկո

1-0` Նագայի (84')

Ճապոնացիները լարված ու անհետաքրքիր խաղի վերջնամասում, այնուամենայնիվ, կարողացան խփել խաղի միակ գնդակը և ապահովել քառորդ եզրափակիչի ուղեգիրը:

Սենեգալ-Ուրուգվայ խաղից հատված

Ինչևէ, իսպանացիների բացակայությամբ ավելի ու ավելի ակնհայտ է թվում Բրազիլիայի հավաքականի առավելությունը մրցաշարում: Իսկ որպես բրազիլացիների հնարավոր մրցակիցներ` պետք է Մեծ Բրիտանիային ավելացնել ևս մի քանի թիմեր, ինչպիսիք կարող են լինել Սենեգալը, Հարավային Կորեան, Մեքսիկան, Ճապոնիան: Ավելի հստակ պատկեր կստանանք օգոստոսի 1-ին, երբ խմբային փուլը կավարտվի: 

Read more »

Հայկական ֆուտբոլը այս անգամ էլ չունեցավ 3-րդ փուլի իր “Ծիծեռնակը”

Կայացան Եվրոպա լիգա խաղարկության 2-րդ փուլի` «Շիրակ» (Գյումրի, Հայաստան) - «Բնեյ Եհուդա» (Թել Ավիվ, Իսրայել) և «Գանձասար» (Կապան, Հայաստան) - «Սերվետ» (Ժնև, Շվեյցարիա)  պատասխան հանդիպումները: Ցավոք, մեր 2 մարզային թիմերն էլ, արդեն իսկ 2-րդ փուլում լքեցին մրցասպարեզը: Հիշեցնենք,  որ մեր 2 ակումբներն էլ առաջին հանդիպումներն անցկացրել էին մրցակցի հարկի տակ և երկուսն էլ պարտվել` միևնույն 0:2 հաշվով: Պատասխան հանդիպումներից առաջ հայ ֆուտբոլասերները քիչ թե շատ հավատում էին Գյումրիի «Շիրակի» հաջորդ փուլ դուրս գալու հեռանկարին, իսկ ահա «Գանձասարի» հաջորդ փուլ դուրս գալու հավանականությունը քիչ էր, քանի որ շվեյցարական ակումբը այս պահին ակնհայտ ուժեղ էր «Գանձասարից»: 

Պատասխան խաղերում էլ, մեր 2 ակումբներն էլ զիջեցին սեփական հարկի տակ: Գյումրիում` «Շիրակը» զիջեց «Բնեյ Եհուդային» 0:1 հաշվով: Հյուրերից միակ գոլը հեղինակեց Շալեմ Մենաշեն: Ի դեպ,  սա այն նույն ֆուտբոլիստն է, որը կարողացավ գոլ խփել «Ուլիսի» դարպասը 2010 թվականի Եվրոպա լիգա խաղարկության պատասխան խաղում, և դուրս թողեց հետագա պայքարից: Մենաշեի խփած գոլը, ինչու չէ, նաև «Շիրակին» դուրս թողեց հետագա պայքարից, և կարելի է ասել, որ այս ֆուտբոլիստը դարձել է հայկական ֆուտբոլային ակումբների «դահիճը»: Կապանի «Գանձասարն» էլ սեփական հարկի տակ ընդունեց շվեյցարական «Սերվետին» և զիջեց 1:3 հաշվով: Վազգեն Սարգսյանի անվան` «Հանրապետական» մարզադաշտում, հյուրերից հաշիվը բացեց բրազիլացի Դե Ասեվեդոն, այնուհետև` «Սերվետից» դուբլ ձևակերպեց Պոնտը: Հետաքրքիր է, որ հյուրերի կիսապաշտպանը 2 գոլն էլ խփեց դարպասապահ Արսեն Բեգլարյանի անդրադարձից հետո: Եվ երբ հաշիվն արդեն 0:3 էր հօգուտ հյուրերի, հանդիպման 91-րդ րոպեին կապանցիներից հաշիվը թրջեց փոխարինման դուրս եկած Հայրապետ Ավագյանը:   

Ցավալի է, երբ մեր 3 ակումբներն էլ 2-րդ փուլի ժամանակ զիջեցին իրենց մրցակիցներին բոլոր 6 հանդիպումներում:  2-րդ փուլերը հայկական ֆուտբոլին չբերեցին ոչ մի վարկանիշային միավոր: Տեղեկացնենք մեր ընթերցողներին, որ վարկանիշային միավորներով է որոշվում, թե որ թիմերն են միմյանց դեմ խաղալու եվրագավաթային հանդիպումներում: Վարկանիշն էլ հաշվարկվում է տվյալ երկրի ակումբների վերջին 5 տարվա եվրագավաթային ելույթներից: Վարկանիշն հաշվարկվում է հետևյալ կերպ` հաղթանակի դեպքում այդ երկրի վարկանիշին գումարվում է մեկ միավոր, իսկ ոչ-ոքու դեպքում` կես միավոր: Հիշեցնենք, որ հայկական թիմերից հաղթանակներ տոնեցին «Շիրակը»` Չեռնոգորիայի «Ռուդարի» նկատմամբ, 1:0 հաշվով մրցակցի հարկի տակ, «Գանձասարը»` Ֆարերյան կղզիների «Ստրեյմուրի» նկատմամբ, 2:0 հաշով սեփական հարկի տակ, և «Փյունիկը»` չեռնոգորական «Զետայի» նկատմամբ, 1:2 հաշվով մրցակցի հարկի տակ: Այսինքն` այս 3 ակումբները, հայկական ֆուտբոլին բերեցին 3 միավոր, և սրան գումարվեց Գյումրիի «Շիրակի» սեփական հարկի տակի ոչ-ոքին` 1:1 հաշվով` ընդհանուր առմամբ կազմելով 3.5 վարկանիշային միավոր: Իսկ այս 3.5-ն էլ բաժանվում է մասնակից թիմերի քանակի վրա: Եվ եթե հաշվի առնենք, որ հայկական թիմերի քանակն էլ 4 է, ապա ստացվում է 0.875 վարկանիշային միավոր: Սրան գումարվում է նաև նախկին 4 տարիների վարկանիշային միավորը: Ամենահետաքրքին այն է, որ հայկական ֆուտբոլի նախկին 4 տարիների վարկանիշն միասին վերցրած կազմում է նույն 0.875-ը: Եվ երկու 0.875-ների գումարը ստացվում է 1.75: Այս վարկանիշով, Հայաստանն իրենից հետ է թողնում միայն` Ֆարերյան կղզիներին, Անդորրային և Սան Մարինոյին: Եվ զարմանալի է նաև այն հանգամանքը, որ Հայաստանից առաջ են գտնվում այնպիսի գաճաճ պետություններ, ինպիսիք են` Լյուքսեմբուրգը, Մալթան, ինչպես նաև Լիխտենշտեյնը: Հայկական ֆուտբոլային ակումբներին 2013-14 թվականների մրցաշրջանում Եվրոպա լիգայում կարող են բաժին ընկնել ոչ շատ ուժեղ մրցակիցներ` ամենայն հավանականությամբ` չեռնոգորական, մոլդովական, վրացական, մակեդոնական կամ նույն մակարդակի այլ ակումբներ:    

Ինչևէ, մեր վերջին հույսերը` 2 մարզային ակումբները, զիջեցին իրենց մրցակիցներին և թողեցին պայքարը, արդեն իսկ 2-րդ փուլում:  Եթե հաշվի առնենք նաև այն հանգամանքը, որ «Ուլիսն» էլ Չեմպիոնների լիգայի 2-րդ փուլում զիջեց Մոլդովայի «Շերիֆին», ապա պետք է փաստել, որ այս անգամ էլ հայկական ֆուտբոլը  չունեցավ 3-րդ փուլի իր “ծիծեռնակը”:

Read more »

Ֆուտբոլն Օլիմպիական խաղերում. Մաս-3` Մեծ Բրիտանիայի հավաքական

Լոնդոնը հերթական անգամ ընդունում է Օլիմպիական խաղերը, և բրիտանացի ֆուտբոլիստները այս անգամ հայտնվել են տանտիրոջ իրավիճակում: Սակայն ով է իրական տանտերը, դա արդեն վիճարկվող հարց է, քանի որ ֆուտբոլային աշխարհին հայտնի չորս բրիտանական հավաքականները այստեղ խաղալու են մեկ դրոշի ներքո: Դժվար է ասել` ինչքանով մրցունակ կլինի այդ հավաքականը, բայց դա այս դեպքում միակ խնդիրը չէ: Բրիտանացիների համար նույնիսկ այս թիմը որպես հավաքական ըմբռնելը դժվար է, ուր մնաց երկրպագելը: Վերջիվերջո` ի՞նչ երգել խաղերի ժամանակ: 

Խնդիրը ամեն դեպքում նոր չէ, Մեծ Բրիտանիայի հավաքականը որպես այդպիսին մասնակցել է Օլիմպիական խաղերին, բայց դա վերջին անգամ եղել է հեռավոր 1960-ին, և երկրպագուները վաղուց մոռացել են այդ մասին: Իսկ հիշելու բան առանձնապես չկա էլ, Մեծ Բրիտանիան օլիմպիական մրցաշարերում հաղթել է 1908-ին և 1912-ին, սակայն այդ ժամանակ մրցաշարին մասնակցել են սիրողական թիմեր: Իսկ վերջին 50 տարիներին, ինչպես նշվեց, թիմը խաղերին երբևէ չի մասնակցել: 

Այս տարի թիմի վերադարձը խաղեր, այն էլ բրիտանական մայրաքաղաքում, ընդ որում այն ժամանակահատվածում, երբ շատերը խոսում են բրիտանական ֆուտբոլի ճգնաժամի մասին,  բրիտանական ֆուտբոլային շրջանակների համար առավել է կարևորում մրցաշարը: Իսկ հաջողության հասնելու համար գործը վստահվեց Սթյուարտ Պիրսին: 

Մարզիչ` Սթյուարտ Պիրս

Պիրսը որպես մարզիչ լուրջ հաջողություններ դեռ չունի, մարզչական փորձ էլ առանձնապես չի կուտակել, մինչ այս մարզել է Անգլիայի Մ-21 հավաքականը, իսկ 2005-2007թթ. գլխավորել է «Մանչեսթր Սիթին»: Որպես ֆուտբոլիստ Պիրսը առավել հայտնի է, կարիերայի մեծ մասն անցկացրել է «Նոթինգհեմ Ֆորեսթ» ակումբ` երկար ժամանակ լինելով նաև թիմի ավագ: Անգլիայի հավաքականի կազմում անցկացրել է 78 հանդիպում: 

Կազմը.

Ստանձնելով օլիմպիական հավաքականի ղեկը` Պիրսը արդեն հասցրել է ընդունել բրիտանական քննադատների հարվածները` հավաքական չհրավիրելով Դևիդ Բեքհեմին: Դրա փոխարեն նա ավագի թևկապը վստահեց ոչ պակաս փորձառու Ռայան Գիգզին: Ընդհանուր առմամբ, բրիտանական հավաքականում տեղ են գտել 12 անգլիացիներ և 6 ուելսցիներ, իսկ շոտլանդացիների և հյուսիսիռլանդացիների համար Պիրսը տեղ չգտավ: 

Դարպասապահներ` Ջեկ Բատլենդ («Բիրմինգհեմ»), Ջեյսոն Սթիլ («Միդլսբրո»),

Պաշտպաններ` Ռայան Բերտրան («Չելսի»), Ստիվեն Քոլկեր («Տոտենհեմ»), Միկա Ռիչարդս («Մանչեսթր Սիթի»), Քրեյգ Դոուսոն («Վեսթ Բրոմվիչ»), Դենի Ռոուզ («Տոտենհեմ»), Նեյլ Թեյլոր («Սուոնսի»), Ջեյմս Թոմկինս («Վեսթ Հեմ»),

Կիսապաշտպաններ` Ջո Ալեն («Սուոնսի»), Թոմ Քլեվերլի («Մանչեսթր Յունայթեդ»), Ջեք Քորկ («Սաութհեմփթոն»), Ռայան Գիգզ  («Մանչեսթր Յունայթեդ»), Աարոն Ռեմսի («Արսենալ»), Սքոտ Սինքլեյր («Սուոնսի»),

Հարձակվողներ` Քրեյգ Բելամի («Լիվերպուլ»), Մարվին Սորդել («Բոլթոն»), Դանիել Ստարիջ («Չելսի»):

Բրիտանական հավաքականը ակնհայտորեն կարող էր ուժեղացնել Գարեթ Բեյլը, սակայն նա դուրս մնաց թիմից վնասվածքի պատճառով: 23 տարեկանից մեծ երեք խաղացողներն են Միկա Ռիչարդսը, Քրեյգ Բելամին և ավագ Ռայան Գիգզը, ով իր ուսերին տանելու է պատասխանատվության ամենամեծ չափաբաժինը Պիրսից հետո: 

Մրցակիցները.

Մեծ Բրիտանիան A խմբում է, որտեղ մրցակիցներն են Սենեգալի, Արաբական Էմիրությունների և Ուրուգվայի հավաքականները: Խումբը բավական ուժեղ է, հատկապես Ուրուգվայի հավաքականը, ով դաշտ դուրս կգա Սուարես-Կավանի հարձակողական զույգով: Սենեգալի հավաքականը նույնպես կարող է լուրջ հավակնություններ ներկայացնել. աֆրիկյան թիմերը սովորաբար հաջողակ են օլիմպիական խաղերում: Հուլիսի 26-ին բրիտանացիները կմրցեն Սենեգալի, 29-ին` Արաբական Էմիրությունների, իսկ օգոստոսի 1-ին` Ուրուգվայի հավաքականների հետ: 

Մեծ Բրիտանիայի հավաքականը այս կազմով արդեն կրել է առաջին անհաջողությունը` հուլիսի 20-ին Բրազիլիայի հավաքականի դեմ ընկերական խաղում: Բրիտանացիները պարտվեցին 0-2 հաշվով զիջելով խաղային գրեթե բոլոր առումներով: Մեկ շաբաթվա ընթացքում կկարողանա՞ արդյոք Պիրսը կառուցել մարտունակ թիմ` պարզ կդառնա առաջիկա օրերին: 

Read more »

450+90 կամ 5+1

Ավարտվեց Չեմպիոնների լիգայի որակավորման 2-րդ փուլի "Շերիֆ" (Տիրասպոլ, Մոլդովա) - "Ուլիս" (Երևան, Հայաստան) հանդիպումը: Պետք է մեծ ափսոսանքով հավելենք նաև, որ Հայաստանի 2011 թվականի չեմպիոն Երևանի "Ուլիսը" լքեց ասպարեզը պատասխան խաղում` նորից պարտվելով Մոլդովայի չեմպիոն Տիրասպոլի "Շերիֆին": Նախախաղային մամուլի ասուլիսում "Շերիֆի" գլխավոր մարզիչ, սերբ մասնագետ` Միլան Միլանովիչը ասել էր, որ, չնայած առաջին խաղի գրանցված արդյունքին, իր թիմը պատասխան խաղում էլ անպայման հաղթելու համար է մտնելու մարզադաշտ և կարծիք էր հայտնել, որ շատ դժվար հանդիպում է սպասվում իր թիմին: Նմանատիպ կարծիք էր հայտնել նաև "Շերիֆի" ավագ, սլովենացի կենտրոնական պաշտպան Միլար Սամարջիչը: Իսկ ահա "Ուլիսի" գլխավոր մարզիչ  Սևադա Արզումանյանն էլ համոզմունք էր հայտնել, որ իր թիմը խաղալու է ինքնանվիրումով և փորձելու է անցնել Տիրասպոլի "Շերիֆի" արգելքը, միաժամանակ հավելելով նաև, որ մրցակցի հնարավորությունները` հաջորդ փուլում հայտնվելու, ավելի բարձր են: Մինչ խաղին անդրադառնալը նշենք, որ "Ուլիսին" այս անգամ էլ չհաջողվեց գոլ խփել և տխուր ավանդույթը շարունակվեց: Սա "Ուլիսի" 6-րդ հանդիպումն էր եվրագավաթներում և 6-րդ խաղն անընդմեջ "Ուլիսին" չի հաջողվում գրավել մրցակիցների դարպասը: Հանդիպումից առաջ շատ էր խոսվում նաև մրցավարի գործոնի մասին, քանի որ հանդիպումը սպասարկելու էր սերբ մրցավար` Վլադո Գլոժովիչը, իսկ Շերիֆի գլխավոր մարզիչը սերբ մասնագետ Միլան Միլանովիչն է, և "Շերիֆի" հայտացուցակում կան 4 սերբ ֆուտբոլիստներ: Սակայն պետք է հավելել, որ սերբ մրցավարը պատվով կատարեց իր գործը, և ամբողջ հանդիպման ընթացքում կոպիտ սխալներ ի օգուտ "Շերիֆի" չեղան: Այսինքն` "Ուլիսի" պարտության գործում մրցավարի գործոնը բացառվում է:

Մինչ խաղին անդրադառնալը, նաև նշենք, որ 2 թիմերի հիմնական կազմերում էլ կատարվել էին մեկական փոփոխություն: "Ուլիսի" կազմում մեկնարկային րոպեներից խաղադաշտում հայտնվեց Արամ Բարեղամյանը, որը հիմնական կազմում էր հայտնվել Արսեն Բալաբեկյանի փոխարեն, զբաղեցրել էր կենտրոնական կիսապաշտպանի դիրքը, իսկ առաջ քաշված հարձակվողի պարտականություննրը կատարում էր Շոթա Ջիկիան: Իսկ "Շերիֆից" էլ մեկնարկային կազմում չէր բոլիվիացի 20-ամյա հարձակվող Ռիոսը. նրա փոխարեն խաղադաշտում էր հայտնվել Մարկո Ստանոեվիչը: Իսկ այժմ անդրադառնանք "Շերիֆ" "Ուլիս" պատասխան հանդիպմանը:

Խաղը սկսվեց Երևանի ժամանակով ժամը 21-ին Տիրասպոլի "Շերիֆ" մարզադաշտում: Եվ որքան էլ զարմանալի էր` առաջին խաղի գրանցված արդյունքն էլ "Շերիֆի" համակիրներին չէին ստիպել մարզադաշտ գնալ և պատկերացրեք, որ 13.300 հանդիսական ընդունող մարզադաշտում շատ էին ազատ նստատեղերը: Մրցավարի` խաղի սկիզբն ազդարարող սուլիչից հետո "Ուլիսը" միանգամից անցավ գրոհների: Ակտիվ խաղի սկիզբը հուսադրող էր, որ "Ուլիսը" կհասնի հաջողության, սակայն պետք է նշել, որ կրկնվեց գրեթե նույն հանդիպման սցենարը, ինչ Երևանում էր: Միայն "Ուլիսի" կողմից բացակայում էր վերջնական հարվածը, վերջնական ճիշտ փոխանցումը և Շոթա Ջիկիայի հարվածի նման կատարված վտանգավոր հարվածը: Նորից անդրադառնալով հանդիպման առաջին կեսի ընթացքին` պետք է նշել այն ուրախալի հանգամանքը, որ "Ուլիսի" ակտիվությունն այնքան էր նկատվում, որ "Շերիֆն" ընտրել էր հակագրոհների մարտավարությունը: Սակայն "Շերիֆի" հակագրոհներն շատ ավելի վտանգավոր էին, քան "Ուլիսի" գրոհները, քանի որ "Ուլիսի" գրոհներում պակասում էին վերջին կարևոր փոխանցումը և վերջնական դիպուկ հարվածը: Իսկ ահա "Շերիֆն" առնվազն 2 անգամ կարող էր գրավել "Ուլիսի" դարպասը: Նախ 21-րդ րոպեին մոլդովական ակումբի կիսապաշտպան Մարիան Մարիանովիչի հուժկու հարվածից հետո գնդակը դիպավ դարպասաձողին. պետք է նշել, որ իրոք Մարիանովիչը տիրապետում էր շատ հուժկու հարվածների և իզուր չէ, որ հանդիսանում է իր թիմի ստանդարտների հիմնական խաղարկողը:  Իսկ ահա 43-րդ րոպեին էլ "Ուլիսին" 2-րդ անգամ օգնության հասավ դարպասաձողը. Դեդովի հարվածից հետո գնդակը նորից դիպչեց դարպասաձողին: Իսկ "Ուլիսի" գրոհներից պետք է առանձնացնել 16-րդ րոպեին վրացի հարձակվող Շոթա Ջիկիայի գլխի հարվածը, որը բարձր ստացվեց և 33-րդ րոպեին Արտակ Գրիգորյանի շատ վտանգավոր փոխանցումը դեպի Դավիթ Գրիգորյանը, սակայն վերջինս կամ չէր սպասում գնդակին, կամ էլ արագությունը չբավարարեց գնդակը կասեցնելու և միայնակ մնալու համար դարպասապահի դեմ-դիմաց: Նշենք նաև, որ "Ուլիսի" կոնգոցի կիապաշտպան Լիե Պատոն առաջին խաղակեսում աջ եզրում շատ ակտիվ էր և անընդհատ լարվածության մեջ էր պահում "Շերիֆի" ֆուտբոլիստներին: Առաջին խաղակեսում այդպես էլ հաշիվը չբացվեց 0:0:
Եկավ  2-րդ խաղակեսը, և "Շերիֆի" ֆուտբոլիստները միանգամից տիրեցին նախաձեռնությանը` ստիպելով "Ուլիսին" գամվել պաշտպանությունում: 2-րդ խաղակեսում էլ "Ուլիսն" ստիպված ընտրեց հակագրոհների մարտավարություն, քանի որ մրցակիցը ավելի ակտիվ էր գրոհում: Առաջին քիչ թե շատ մտածված հակագրոհը երևանցիները կազմակերպեցին 50-րդ րոպեին, սակայն այս անգամ էլ բացակայում էր վերջնական հարվածը: "Ուլիսի" ֆուտբոլիստների մոտ շատ լավ ստացվում էր կիսապաշտպանական գիծն անցնելը, սակայն բացակայում էր վերջնական ճշգրիտ փոխանցումը, քանի որ առջևում "Ուլիսը" կատարող էլ չուներ: 2-րդ խաղակեսի 64-րդ րոպեին Սևադա Արզումանյանը գրոհներին սրություն հաղորդելու հույսով խաղադաշտ դուրս բերեց Արսեն Բալաբեկյանին, որը երևանյան մրցավեճում հանդես էր գալիս հարձակման կիզակետում: Այս խաղն էլ բացառություն չեղավ և Արսեն Բալաբեկյանի խաղադաշտ դուրս եկավ թիմի ավագ Դավիթ Գրիգորյանի փոխարեն, Շոթա Ջիկիան շարժվեց ձախ եզր և Արսեն Բալաբեկյանը զբաղեցրեց առաջ քաշված հարձակվողի գոտին: Սակայն այս անգամ էլ չարդարացան Սևադա Արզումանյանի սպասելիքները և նորից Արսեն Բալաբեկյանը գոլով աչքի չընկավ: Եվ ահա եկավ չարաբաստիկ 66-րդ րոպեն: "Շերիֆի" 20-ամյա սերբ կիսապաշտպան  Ալեքսանդր Պեշիչը ներխուժեց "Ուլիսի" տուգանային հրապարակ և նրա նկատմամբ կանոնները խախտեց վրացի պաշտպան Թնգիզ Ուգրեխելիձեն, որը ի դեպ կատարում էր թիմի ավագի պարտականությունները Դավիթ Գրիգորյանին փոխարինելուց հետո: Մրցավար Գլոդժովիչը առանց վարանելու իրավացիորեն ցույց տվեց 11 մետրանոց նշակետը: Գնդակին մոտեցավ "Շերիֆի" ավագը` Միրալ Սամարջիչը և չվրիպեց 11 մետրից` բացելով հանդիպման հաշիվը: Այս գոլից հետո, խաղի առանց այն էլ ցածր տեմպը էլ ավելի ընկավ: Եվ 2-րդ խաղակեսից էլ հիշարժան մնացին ընդամենը 2 պահ: Նախ` 81-րդ րոպեին Արսեն Բալաբեկյանը փորձեց ներխուժել տիրասպոլցիների տուգանային հրապարակ, և տուգանայինի մատույցներում նրա նկատմամբ խախտեցին խաղի կանոնները: Արագոնեյ դա Սիլվայի հարվածից հետո "Շերիֆի" դարպասապահ Ստոյանովը գնդակն հեռացրեց սեփական տուգանայինից: Իսկ հանդիպման 91-րդ րոպեին էլ "Շերիֆի" փոխարինման դուրս եկած Բուրկինա Ֆասոյի ազգային հավաքականի 27-ամյա կիսապաշտպան` Վիլֆրեդ Բենջամին Բալիման մեն-մենակ հայտնվեց "Ուլիսի" դարպասապահի դեմ, շրջանցելով դեմ դուրս եկած Հովհանիսյանին` հարվածեց  դարպասին, և վրա հասած "Ուլիսի" պաշտպան Թենգիզ Ուգրեխելիձեն սեփական տուգանային հրապարակից հեռացրեց գնդակը, որը ընթանում էր դեպի դատարկ դարպաը: Այս խաղում ևս վստահ և հուսալի խաղով աչքի ընկավ "Ուլիսի" դարպասապահ Էդուարդ Հովհաննիսյանը: 
Կարծում ենք` "Ուլիսի" պարտության գլխավոր պատճառը գոլահար հարձակվողի կամ հարձակվող-կատարողի բացակայությունն էր: Ընդհանրապես խաղը աչքի չընկավ դիտարժանությամբ և 2 թիմերի մոտ էլ շատ էին փոխանցումների խոտանն ու մանկական սխալները: Ինչևէ, ցավով պետք է փաստել, որ Հայաստանի չեմպիոնը շատ անվստահ հանդիպում անցկացրեց և լքեց Չեմպիոնների լիգան որակավորման 2-րդ փուլից, ի դեպ` շատ անփառունակ խաղով: Այս անգամ էլ "Ուլիսը" գոլ չխփեց և չվերացրեց եվրագավաթային հանդիպումնեում գոլ չխփելու տխուր ավանդույթը. 450 րոպեներին գումարվեց ևս 90-ը և եվրագավաթներում անցկացրած 5 գոլազուրկ հանդիպումներին գումարվեց ևս 1-ը:   

Read more »

Ֆուտբոլն Օլիմպիական խաղերում. Մաս-2` Իսպանիայի հավաքական

Արդեն անցյալում է Եվրոպայի առաջնությունը, և Եվրոպայի մինչև 19 տարեկանների առաջնությունը, որտեղ հաղթողներ ճանաչվեցին Իսպանիայի հավաքականները, այժմ հերթը Իսպանիայի մինչև 23 տարեկանների օլիմպիական հավաքականինն է, որը պայքարի է ներգրավելու Լոնդոնի 2012 թվականի ամառային օլիմպիական խաղերում` հուլիսի 25-ից օգօստոսի 11-ն ընկած ժամանակահատվածում: Այժմ Իսպանիայի հավաքականների ֆուտբոլասերներին մի հարց է մտահոգում` կհաջողվի՞ արդյոք, Իսպանիայի հավաքականին նվաճել Օլիմպիական խաղերի հաղթողի կոչումը` 1992 թվականի Բարսելոնայի Օլիմպիական խաղերից հետո, 20 տարի անց, Լոնդոնի Օլիմպիական խաղերում:  Ինչպես արդեն նշել ենք` "Գոլիզեում" բլոգը կանդրադառնա Օլիմպիական խաղերի ընթացքին, իսկ այժմ ծանոթանանք մրցաշարի գլխավոր ֆավորիտներից մեկի` Իսպանիայի օլիմպիական հավաքականի հետ:

1992թ. Իսպանացիների հարձակվող Կիկոն տոնում է գոլը

Պատմությունը: 

 Օլիմպիական հավաքականների պատմությունը բաժանվում է 2 ժամանակահատվածի` 1920-1988 թվականները և 1992 թվականի օլիմպիական խաղերից հետո: Սկսած 1992 թվականի Բարսելոնայի օլիմպիական խաղերից, որոշում կայացվեց, որ տղամարդկանց հավաքականներում ֆուտբոլիստների տարիքը չպետք է գերազանցի 23 տարեկանը, բացառությամբ 3 ֆուտբոլիստների, իսկ մինչ այդ` այդպիսի որոշում չկար: Նոր ֆորմատով օլիմպիական խաղերը առաջին անգամ անցկացվեց Բարսելոնայի օլիմպիական խաղերում, և հաղթող ճանաչվեց Իսպանիայի օլիմպիական հավաքականը: Խմբային փուլում իսպանացիները նախ հաղթեցին Կոլումբիայի օլիմպիական հավաքականին 4:0 հաշվով, այնուհետև միևնույն 2:0 հաշվով հաղթանակներ տարան համապատասխանաբար` Քաթարի և Եգիպտոսի օլիմպիական հավաքականների նկատմամբ և բացարձակ արդյունքով դուրս եկան քառորդ եզրափակիչ: Քառորդ եզրափակիչում իսպանացիների ճանապարհը փորձեցին փակել իտալացիները, սակայն չհաջողվեց, և Իսպանիան, հաղթելով 1:0 հաշվով, դուրս եկավ կիսաեզրափակիչ: Կիսաեզրափակիչում իսպանացիներին փորձեցին դիմադրել գանացիները, սակայն աֆրիկացիներին նույնպես դա չհաջողվեց և իսպանացիների` 2:0 հաշվով հաղթանակը նրանց դուրս բերեց եզրափակիչ: Եզրափակիչը կայացավ Բարսելոնայի "Կամպ Նոու" մարզադաշտում, և 95 հազար ֆուտբոլասերների առջև Իսպանիայի օլիմպիական հավաքականը գոլառատ խաղում 3:2 հաշվով կարողացավ առավելության հասնել Լեհաստանի օլիմպիական  հավաքականի նկատմամբ: Սա իսպանացիների թերևս միակ փառավոր հաղթանակն է օլիմպիական խաղերում: Նշենք նաև, որ իսպանացիները ևս 1 անգամ հասել են եզրափակիչ 2000 թվականի Սիդնեյի Օլիմպիական խաղերում և զիջել են Կամերունի ընտրանուն հետխաղյա 11 մետրանոց հարվածաշարով` 5:3 հաշվով: 2000 թվականից հետո իսպանացիները ուղեգիր չեն նվաճել  խաղալու 2004 թվականի Աթենքի և 2008 թվականի Պեկինի օլիմպիական խաղերում: Եվ այժմ իսպանացիները, 12 տարի անց նորից նվաճելով օլիմպիական խաղերի ուղեգիր, հաղթանակի ծարավով նորից կներգրավեն պայքարի և կփորձեն ապացուցել, որ ուժեղ են նաև օլիմպիական հավաքականների մակարդակով:

Մարզիչը:

Իսպանիայի օլիմպիական հավաքականի գլխավոր մարզիչն է 2011 թվականի Իսպանիայի մինչև 21 տարեկաննների հավաքականների Եվրոպայի առաջնության հաղթող մարզիչ Լուիս Միլլան: Միլլան, որպես ֆուտբոլիստ, խաղացել է կիսապաշտպանի դիրքում, և հանդես է եկել իսպանական 3 գրանդ ակումբնրում` "Բարսելոնայում", Մադրիդի "Ռեալում" և "Վալենսիայում": Խաղացել է նաև Իսպանիայի ազգային հավաքականում 1989-1990

թվականներին և անցկացրել է 3 հանդիպում: 2001 թվականից սկսած Միլլան ավարտել է ֆուտբոլիստի կարիերան և սկսել է զբաղվել մարզչական գործունեությամբ` սկսած 2006 թվականից: 2006-07 թվականներին Միլան մարզել է համեստ "Պուկոլ" ակումբը: 2007-08 մրցաշրջանում էլ աշխատել է "Խետաֆե" ակումբում որպես գլխավոր մարզչի օգնական: Սկսած 2008 թվականից` իսպանացի մասնագետը սկսել է մարզել Իսպանիայի տարբեր տարիքային հավաքականները: Նախ` 2008-2010 թվականներին,  մարզել է մինչև 19 և 20 տարեկանների հավաքականները, այնուհետև, սկսած  2010 թվականից  էլ, Միլլան սկսել է մարզել, կարելի է ասել, նույն թիմը` որոշ փոփոխություններով, արդեն` մինչև 21 տարեկանների Իսպանիայի հավաքականը: 2011 թվականի հաղթանակից հետո էլ Միլլային վստահվեց նաև Իսպանիայի մինչև 23 տարեկանների օլիմպիական հավաքականը, քանի որ գրեթե նույն ֆուտբոլիստներն են ընդգրկված օլիմպիական հավաքականում, ում հետ որ Միլլան 2011 թվականին նվաճել է Եվրոպայի չեմպիոնի կոչումը:

Կազմը:

Իսպանիայի օլիմպիական հավաքականը, ինչպես մնացած հավքականները իրավունք ուներ ընդգրկելու ընդամենը 18 ֆուտբոլիստների: Ամենահետաքրքիր նորությունը կապված կազմի հետ  այն է, որ Լուիս Միլլան իր 18 ֆուտբոլիստների շրջանակում չի ընդգրկել Իսպանիայի չեմպիոն հռչակված Մադրիդի "Ռեալից" ոչ մի ֆուտբոլիստի: Այսպես 18 ֆուտբոլիստների շրջանակներում են. դարպասապահներ` Դավիդ դե Գեա("Մանչեսթեր Յունայթեդ", Անգլիա),Դիեգո Մարինո ("Վիլյառեալ"), պաշտպաններ` Սեզար Ասպիլիսուետա ("Օլիմպիկ" Մարսել, Ֆրանսիա),Ալվարո Դոմինգես ("Բորուսիա" Մյունխենգլադբախ, Գերմանիա), Ինիգո Մարտինես ("Ռեալ Սոսիեդադ"), Խորդի Ալբա ("Բարսելոնա"), Ալբերտո Բոտիա ("Սպորտինգ" Խիխոն), Մարտին Մոնտոյա ("Բարսելոնա"): Կիսապաշտպաններ` Խավի Մարտինես ("Ատլետիկ" Բիլբաո), Իկեր Մունիային ("Ատլետիկ" Բիլբաո), Խուան Մատա ("Չելսի", Անգլիա),Կոկե ("Ատլետիկո" Մադրիդ), Իսկո ("Մալագա"), Օրիոլ Ռոմեու ("Չելսի", Անգլիա), Անդեր Հերերա ("Ատլետիկ" Բիլբաո): Հարձակվողներ` Ադրիան Լոպես ("Ատլետիկո" Մադրիդ,) Ռոդրիգո Մորենո ("Բենֆիկա", Պորտուգալիա), Քրիստիան Տելլո ("Բարսելոնա"): Ինչպես տեսնում ենք` չկա Մադրիդի "Ռեալից" ոչ մի ֆուտբոլիստ, փոխարենը "Ռեալի" գլխավոր հակառակորդ` "Բարսելոնայից", Միլլան իր ընտրանու կազմ է վերցրել միանգամից 3 ֆուիտբոլիստի: Թիմի ավագը ֆրանսիական "Օլիմպիկ" Մարսել ակումբի պաշտպան Սեզար Ասպիլիսուետան է: 23 տարեկանից բարձր 3 ֆուտբոլիստներն են. կիսապաշտպաններ`24-ամյա Խավի Մարտինեսը` Բիլբաոի "Ատլետիկից", 24-ամյա Խուան Մատան` Լոնդոնի "Չելսիից" և հարձակվող` 24-ամյա Ադրիան Լոպեսը Մադրիդի "Ատլետիկոյից"

Թիմի ավագ` Սեզար Ասպիլիսուետա

Մրցակիցները:

Լոնդոնի Օլիմպիական խաղերում Իսպանիայի հավաքականը ընդգրկվել է D խմբում, որտեղ մրցակիցներն են Ճապոնիայի, Հոնդուրասի և Մարոկկոյի օլիմպիական հավաքականները: Առաջին խաղը իսպանացիները կանցկացնեն Գլազգոյի "Հեմփդեն Պարկ" մարզադաշտում, հուլիսի 26-ին կընդունեն ճապոնացիներին, հուլիսի 29-ին Նյուքասլի "Սենթ Ջեյմս Պարկ" մարզադաշտում կխաղան հոնդուրասցիների դեմ, իսկ ահա վերջին` 3-րդ խաղն էլ կկայանա օգոստոսի 1-ին` Մանչեսթրի "Օլդ Թրաֆորդ" մարզադաշտում: Լա Ֆուրիա Ռոխա-յի (այսպես են անվանում իսպանացիները իրենց օլիմպիական հավաքականին խմբ.) մրցակիցը կլինի Մարոկկոյի Օլիմպիական հավաքականը:

Իսպանիայի օլիմպիական հավաքականը

Վերջում հավելենք նաև, որ Իսպանիայի օլիմպիական հավաքականում բոլորից շատ հանդիպումների է մասնակցել  նախկինում հայտնի ֆուտբոլիստ, իսկ այժմ մարզիչ` Լուիս Էնրիկեն, որը 1991-92 թվականների ընոացքում մասնակցել է 14 հանդիպման, իսկ լավագույն ռմբարկուն էլ` Կիկոն է, որը նույնպես խաղացել է 1991-92 թվականներին, մասնակցել է 12 հանդիպման և դարձել 7 գոլի հեղինակ: Հիմա արդեն ժամանակն է նոր հերոսների:

  

Read more »

Արսեն Վենգերը բացում է ֆուտբոլային սկաուտինգի գաղտնիքները

Հայկական ֆուտբոլի նկատմամբ ուշադրությունը վերջին տարիներին աճում է, մոտեցումները դառնում են ավելի պրոֆեսիոնալ, սակայն առանձնացնենք մի  կարևոր ոլորտ, որտեղ տեղաշարժեր դեռ չկան, բայց որը կարող է լուրջ հաջողությունների գրավականը դառնալ. խոսքը սկաուտինգի մասին է: «Գոլիզեում» բլոգը ձեզ է ներկայացնում ֆուտբոլային սկաուտինգի ոլորտում ամենահայտնի մասնագետներից մեկի` Արսեն Վենգերի հարցազրույցը, որտեղ նա բացում է մի շարք մասնագիտական գաղտնիքներ.

-«Արսենալում» ձեր աշխատանքի տարիներին այս ակումբը հայտնի դարձավ տաղանդավոր կատարողներ գտնելու իր ունակությամբ: Կա՞ ինչ-որ հոտառություն կամ ինտուիցիա խաղացողի փնտրման ընթացքում: Եվ առկա՞ է այն Ձեր մոտ:

-Այո, այդպիսի բան իրոք առկա է: Որոշ մարդկանց մոտ այդ զգացողությունն ավելի ուժեղ է, քան մյուսների մոտ, նրանք ղեկավարվում են որոշակի առաջնահերթություններով: Իմ կողմից հավակնոտ կհնչի ասելը, որ ես այս մարդկանց շարքին եմ դասվում, բայց ես այդ ուղղությամբ աշխատել եմ շատ վաղուց: Ես ձեռք եմ բերել շատ երիտասարդ խաղացողների, բայց ես միաժամանակ իմ մեծ երախտապարտությունն եմ հայտնում սկաուտներին և մարզիչներին այդ գործում օգնության համար: Երբ ես հավատում եմ խաղացողին, նրան հնարավորություն եմ տալիս:

-Ո՞րն է այն նվազագույն տարիքը, որի դեպքում դուք կարող եք որոշել խաղացողի ներուժը: Եղե՞լ է դեպքեր, որ դուք նայեք խաղացողին և ամեն ինչ ակնթարթորեն հասկանաք:

-12 տարեկանում կարելի է որոշել խաղացողի տեխնիկական ցուցանիշները, կխաղա՞ նա արդյոք, թե ոչ: 14-16 տարեկան հատվածում պարզ է դառնում, թե արդյո՞ք խաղացողը կհասցնի ֆիզիկական առումով, կկարողանա՞ նա բավարարել պրոֆեսիոնալ ֆուտբոլի պահանջները: 16-18 տարեկանում որոշվում է` արդյո՞ք խաղացողը գիտի ինչպես աշխատել մյուս կատարողների հետ: 20 տարեկանում առաջին պլան են դուրս գալիս հոգեբանական բնութագիրները: Ինչպե՞ս է նա պատրաստվում խաղերին: Ինչպե՞ս է նա հաղթահարում կյանքի գայթակղությունները, պատրա՞ստ է դրանք զոհաբերել: Պետք է պատրաստ լինել սեփական աշխատանքի կատարմանը: Եթե քեզ շանս են տալիս, դու պետք է դրանից օգտվես:

-Ինչքա՞ն ժամանակ է Ձեզ անհրաժեշտ, որպեսզի հասկանաք` կարո՞ղ է արդյոք տվյալ խաղացողը լիարժեք կարիերա անել:

-Առաջին տպավորությունը հանդիսանում է որոշիչ, դրա համար պետք է մոտ 20 րոպե: Իհարկե, այդ ցուցանիշը կարող է փոփոխվել, քանի որ կան ակնհայտ տաղանդավոր խաղացողներ: Կան նաև առաջին հայացքից առավել համեստ կատարողներ, նրանց պետք է տալ մոտ կես տարի, որպեսզի պարզ դառնա` իրո՞ք նրանք ինչ-որ բան արժեն: Լիոնել Մեսսիի համար 13 տարեկան հասակում կպահանջվեր ընդամենը մեկ րոպե: Ես դիտել եմ նրա գործողությունների տեսագրությունը, երբ նա տասներեք է: Նա ստանում է գնդակը, շրջանցում է բոլորին և գրավում է դարպասը: Նա տաղանդ ունի: Որոշների մոտ դա ընդհանրապես չկա, իսկ մեծ մասի մոտ այն ուղղակի քիչ ակնհայտ է:

-Ինչքա՞ն հաճախ է Ձեզ պատահել դիտելու խաղացողի, ով չի կարողանում հաղթահարել պրոֆեսիոնալ միջավայրում առկա ճնշումը:

-Այո, ես շատերին եմ տեսել, ովքեր չեն դիմանում դրան: Երբեմն խանգարում է առողջական վիճակը, իսկ դա շատ կարևոր է: Լավ երիտասարդ խաղացողը կարող է ունենալ ուղղակի վատ գեներ, որի պատճառով էլ ծնկերի կամ սրունքների վատ վիճակը կարող է խաչ քաշել կարիերայի վրա հենց դրա սկզբից: Առողջությունը շատ կարևոր է: Խաղացողները պետք է վաղ արթնանան, չունենան հիվանդագին զգացողություններ, և ամբողջովին ներդնեն իրենց մարզումներին: Այս ամենը տրամաբանական է հնչում, սակայն այսպիսի երաշխիքներ ոչ ոք չի կարող տալ:

-Հաշվի առնելով Ձեր փորձը, ինչքա՞ն ավելի քիչ հավանական է դարձել իրավիճակը, որի դեպքում պոտենցիալ բարձրակարգ խաղացողը սխալմամբ չի հայտնվում Ձեր թիմում:

-Անկեղծ ասած, նման հավանականությունը բավականին նվազել է սկաուտինգի համակարգի և պրոֆեսիոնալ մոտեցման շնորհիվ: Երբ ես երիտասարդ էի, ես ընդամենը գյուղից դուրս եկած մի տղա էի, և չկար ինչ-որ արժեքավոր բան գտնելու հնարավորություն: Իսկ հիմա, եթե դու քեզ դրսևորում ես ինչ-որ տեղ Անգլիայում, դու ունես հնարավորություն: Ես խաղացողներ եմ փնտրում 40 տարիների ընթացքում, քանի որ ես սկսել եմ դրանով զբաղվել շատ վաղ, բայց  նույնիսկ հիմա ես երբեմն սխալներ եմ թույլ տալիս: Ամեն ինչ կախված է կարծիքներից, նույնիսկ թոփ-մակարդակում, դրա համար էլ ես իմ որոշ սաների ասում եմ, որ նրանք չթողնեն իրենց երազանքները:

-Տեխնիկական առաջընթացի և հաղորդակցման հնարավորությունների շնորհիվ, կարելի՞ է ասել, որ հիմա բոլոր երիտասարդ խաղացողները ուսուցանվում են մի համակարգով: Անգլիայում ամեն ինչ նույն կե՞րպ է, թե՞ նախկինի նման կան մշակութային տարբերություններ:

-Ոչ, նախապատրաստության մակարդակները մշտապես փոփոխվում են, նոր մեթոդները միշտ ներդրվում են: Անձամբ ես գտնում եմ, որ երիտասարդ խաղացողների մակարդակը մշտապես աճում է: Ես հանդիպեցի իմ առաջին մարզչին, երբ ես արդեն տասնինը տարեկան էի: Այսօր մարզվող թիմի խաղացողը կարող է լինել հինգ տարեկան, դրա համար էլ նա պատրաստվում է շատ ավելի վաղ հասակից:

-2007 թվականին դուք ասացիք, որ Անգլիայում արդեն ներդրվում են անհրաժեշտ փոփոխությունները երիտասարդ ֆուտբոլիստների նախապատրաստական գործընթացում, և որ ապագայում ավելի տաղանդավոր խաղացողներ կարող են լինել հենց անգլիացիները: Դուք հիմա պաշտպանու՞մ եք այդ տեսակետը:

-Այո: Վերջերս ես ասում էի մեր մարզիչներին, որ առաջին անգամ այս ակումբում աշխատելու տարիների ընթացքում ես տեսնում եմ այսքան լավ երիտասարդ անգլիացիների: Ինձ հաճախ մեղադրում են այն բանի համար, որ ես գնում եմ խաղացողների հիմնականում արտասահմանից, բայց դա այդպես չէ:

-Կարելի՞ է արդյոք համեմատել երիտասարդ բրիտանացիներին մայրցամաքի խաղացողների հետ:

-Տաս տարի առաջ նրանք ավելի թույլ էին, բայց հիմա նրանք արդեն նույն մակարդակի վրա են: Նրանց հանդեպ մոտեցումը այնքան էլ ճիշտ չէր, պակասում էր ընդհանուր տեխնիկական վարպետությունը, սակայն դա արդեն անցյալում է: Դրա մասին են խոսում նաև Մ-17 և Մ-19 տարեկանների հավաքականների ելույթների արդյունքները. իրավիճակը բարելավվել է: Հիմնվելով դպրոցական համակարգի վրա` վերացվել էր սպորտի մրցակցային բնույթը, բայց հիմա պրոֆեսիոնալ ակումբները իրենց հսկողության տակ են առել դպրոցականների մարզման գործընթացը, և դա տալիս է իր պտուղները:

-Բոլոր այն խաղացողներից, որոնց հետ Ձեզ բախտ է վիճակվել աշխատել, ումո՞վ եք առավել շատ հպարտանում:

-Ես հրաժարվում են անուններ տալ, քանի որ չեմ ցանկանում նեղացնել մյուսներին: Որոշները   դրսևորել են իրենց առավել լավ, չնայած որ եղել են ավելի քիչ տաղանդավոր: Անհավատալի զգացողություն է առաջանում, երբ հիշում ես քեզ Լիլիան Թյուրամի կողքին իր կարիերայի սկզբին, որի ընթացքում նա անցկացրեց 142 հանդիպում Ֆրանսիայի ազգային հավաքականում: Նա ամենատաղանդավորը չէր, բայց իր ջանքերը ցնցող էին. ես հպարտ եմ այն բանի համար, որ մասնակցություն եմ ունեցել իր զարգացման գործին: Մարդիկ միշտ ունակ են զարմացնել, հենց դրանում է կայանում հուզիչ պահը: 

Read more »

Հայ-շվեյցարական 11-րդ դիմակայությունը նորից Շվեյցարիայի կողմն է

Ցավոք Կապանի "Գանձասարն" էլ պարտվեց Եվրոպա լիգա խաղարկության 2-րդ փուլում զիջելով մրցակցին 0:2 հաշվով: Միայն այն հանգամանքը, որ կապանցիներից լավագույն ֆուտբոլիստ է ճանաչվել դարպասապահ Արսեն Բեգլարյանը, արդեն իսկ խոսուն փաստ է հանդիպման մասին: Իհարկե ուրախալի է, երբ 19-ամյա դարպասապահը աչքի է ընկնում հուսալի խաղով, սակայն ցավալի է, որ թիմը զիջել է 2:0 հաշվով ու լավագույնն խաղացողն էլ դարպասապահն է, սա նշանակում է, որ "Գանձասարն" ամբողջ խաղի ընթացքում գամված է եղել պաշտպանությունում: Անդրադառնալով հանդիպմանը միայն նշենք, որ մրցակցից գոլեր հեղինակեցին 48-րդ րոպեին թիմի լավագույն ռմբարկու 24 ամյա սերբական ծագումով շվեյցարացի հարձակվող` Գորան Կարանովիչը, որը ի դեպ հասցրել է հանդես գալ Շվեյացարիայի երիտասարդական հավաքականում անցկացնելով 2 խաղ: Հանդիպման 79-րդ րոպեին էլ աչքի ընկավ 19 ամյա շվեյցարացի հարձակվող Կեվին Գիսսին: Հատկանշական է, որ 2 գոլերն "Գանձասարի" դարպասում հայտնվել են գլխի հարվածից հետո: Հարկ է նշել նաև, որ Կեվին Գիսին "Սերվետ" ակումբում է հայտնվել 2012 թվականի ամռանը:

   

       Ինչպես նշեցինք` սա հայ-շվեյցարական 11-րդ դիմակայությունն էր: Ցավոք սրտի նախորդ 10 դեպքերն էլ հաղթական ելք չեն ունեցել հայկական ակումբների համար: Ավելին` նախորդ 10 դեպքերից, հայկական ակումբներին ընդամենը մեկ անգամ է բախտ վիճակվել ոչ ոքի ավարտել հանդիպումը: Այսպես անկախ Հայաստանի պատմության ընթացքում հայ շվեյցարական առաջին դիմակայությունը կայացավ 2003-04 թվականներին, երբ Երևանի "Սպարտակի" (Ի դեպ "Սպարտակ" ակումբը 2005 թվականից վերանվանվել է  "Բանանց"2)  մրցակիցը Ուեֆայի գավաթի (այս մրցաշարը վերանվանվել է Եվրոպա լիգա սկսած 2009-10 մրցաշրջանից) խաղարկությունում այժմյան "Գանձասարի" մրցակից "Սերվետ" ակումբն էր: Առաջին խաղն Երևանում ավարտվեց շվեյցարացիների հաղթանակով 0:2 հաշվով: Պատասխան Խաղում էլ հաղթանակը "Սերվետի" կողմն էր, որն էլ հաղթանակի հասավ 3:0 հաշվով: Այսինքն` առաջին դիմակայությունում հայկական ակումբը 2 խաղերի արդյունքում զիջեց խոշոր 5:0 հաշվով: Դրանից հետո հերթը Երևանի "Արարատինն" էր, որը Ինտերտոտոյի ( ի դեպ Ինտերտոտոյի գավաթի խաղարկությունը 2008 թվականից այլևս չի գործում) գավաթի  խաղարկությունում փորձեց դիմակայել Շվեյցարիան ներկայացնող "Քսամաքս" ակումբին: Առաջին խաղը, որը կայացավ Երևանում Արարատը զիջեց 1:3 հաշվով մեկ շաբաթ անց էլ մրցակցի հարկի տակ "Արարատը" զիջեց խոշոր 6:0 հաշվով (այս հաշիվը դեռևս ամենախոշոր հաշվով պարտությունն է հայ-շվեյցարական ակումբների դիմակայությունում): "Քսամաքսից" հետո 2006-07 և 2007-08 թվականների Ուեֆայի գավաթի խաղարկությունում հայկական ակումբների մրցակիցը Բեռնի "Յանգ Բոյզ" ակումբն էր: Առաջինը "Յանգ Բոյզի" հետ փորձեց պայքարել Երևանի "Միկան": Երևանում կայացած խաղում "Միկան" զիջեց 1:3 հաշվով, իսկ պատասխան խաղում էլ "Յանգ Բոյզը" բավարարվեց նվազագույն հաշվով հաղթանակով: Իսկ ահա 2007-08 մրցաշրջանում էլ, հերթը "Բանանցինն" էր, առաջին խաղն նորից կայացավ Երևանում և արձանագրվեց ոչ ոքի 1:1 հաշիվը, որը ինչպես վերը նշեցինք` մինչ այժմ միակ ոչ ոքի արդյունքն է: Սակայն ամեն ինչ բարեհաջող չդասավորվեց "Բանանցի" համար պատասխան խաղում, և Բեռնը ներկայացնող ակումբը հասավ հաղթանակի, 4:0 հաշվով ջախջախելով "Բանանցին" և 2 դիմակայության արդյունքում "Յանգ Բոյզը" "Բանանցի" նկատմամբ հաղթանակի հասավ 5:1 հաշվով: Հաջորդ դիմակայության հերթը նորից "Արարատինն" էր, որի մրցակիցը "Բելինցոնան" էր Ուեֆայի գավաթի խաղարկության առաջին փուլում: Այս անգամ առաջին խաղն կայացավ "Բելինցոնայի" հարկի տակ և շվեյցարացիները հաղթանակի հասան 3:1 հաշվով, իսկ պատասխան խաղում էլ նորից առավելությունը շվեյցարացիների կողմն էր, և Երևանում կայացած խաղում "Բելինցոնան" հաղթեց նվազագույն` 1:0 հաշվով:  Իսկ ահա վերջին 11-րդ հայ-շվեյցարական դիմակայությունում էլ Կապանի "Գանձասարը" Ժնևի "Ստադ դե Ժնև" մարզադաշտում Սերվետին զիջեց 0:2 հաշվով: Այսպիսով` 11 հայ-շվեյցարական դիմակայությունների արդյունքում 1 խաղ ավարտվել է ոչ ոքի և 10-ն անգամ առավելությունը եղել է շվեյցարացիների կողմը: Իսկ գնդակների հարաբերությունն էլ բնականաբար հուսադրող չէ հայերը խփել են ընդամենը 4 գնդակ, փոխարենը բաց են թողել 29 գնդակ: Հուսանք, որ  հուլիսի 26-ին կայանալիք հայ-շվեյցարական 12-րդ դիմակայությունում,  Երևանի Վազգեն Սարգսյանի անվան "Հանրապետական" մարզադաշտում Կապանի "Գանձասարը" վերջ կդնի այս տխուր ավանդույթին և հայկական ակումբներն էլ կճաշակեն հաղթանակի բերկրանքը շվեյցարական ակումբների հետ պայքարում:

Read more »

«Շիրակը» նվերներ չի ընդունում

Եվրոպա լիգայի որակավորման երկրորդ փուլի առաջին խաղում Գյումրու «Շիրակը» ցավալի պարտություն կրեց իսրայելական «Բնեյ Եհուդա» ակումբից: Հանդիպումը չէր հեռարձակվում  հայկական հեռուստաեթերով, և դա, թերևս, միակ հուսադրող հանգամանքն էր գյումրեցի երկրպագուների համար, քանի որ նրանք չտեսան «Շիրակի» ցուցադրած ֆուտբոլը, որն  առավել հիասթափեցնող էր, քան վերջնական հաշիվը:

Խաղը սկսվեց շատ հանդարտ, հետախուզական տրամադրություններով, և ինչպես ցույց տվեց խաղի հետագա ընթացքը, նույն «հետախուզական» տրամադրությունը գերիշխող էր ամբողջ խաղի ընթացքում: Նման ծանր խաղի պատճառներից մեկը անձրևոտ եղանակն էր, մյուսն էլ, հավանաբար, երկրպագուների աջակցության իսպառ բացակայությունը: Այսպիսի խաղը շատ հազվադեպ էր բերում վտանգավոր պահերի, ավելի շատ էին ստանդարտ դիրքերը և անկյունայինները, սակայն ստանդարտներից ոչ մի վտանգավոր հարված կամ մտածված կոմբինացիա չհետևեց ողջ խաղի ընթացքում: «Շիրակի» դարպասապահ Արթուր Հարությունյանը մեկ-երկու դեպքերում մտավ խաղի մեջ և բավականին վստահ գործեց: Ինչպես «Ռուդարի» հետ խաղում, այս անգամ էլ «Շիրակը» թույլ էր տալիս մրցակցին հեշտությամբ անցնել միջին գիծը և մոտենալ տուգանային հրապարակին, սակայն մրցակցի կողմից սուր գործողությունները բացակայում էին: Խաղակեսի կեսից միայն մեր թիմը կարողացավ որոշակիորեն կարգավորել խաղը և գնդակ պահել, սակայն լուրջ գրոհներ, այնուամենայնիվ, չկազմակերպվեցին: Վարդան Բիչախչյանը հարձակողական գիծը վստահել էր թիմի սևամորթ եռյակին, սակայն նրանց խաղը առանձնապես չէր ստացվում: Բացակայում էին Յորոյի եզրային անցումները, իսկ Բեկոյին էլ մեծ մասամբ գնդակը չէր հասնում: Առավել ակտիվ էր Դամե Դիոպը, որը երբեմն կարողանում էր լարվածություն ստեղծել իսրայելական թիմի պաշտպանությունում: Խաղակեսի վերջին րոպեին Բեկոյի դեմ կոպիտ խախտման համար դաշտից հեռացվեց «Բեյ Եհուդայի» պաշտպան Հադադ Ավիվը: «Շիրակը» ստացավ լուրջ հնարավորություն` երկրորդ կեսի ընթացքում բեկելու խաղի ընթացքը և որոշել դիմակայության ելքը Գյումրի վերադառնալուց առաջ:

Երկրորդ խաղակեսը հայկական թիմը սկսեց առավել ակտիվ ու վստահ, և տպավորություն ստեղծվեց, որ «Շիրակը» ձեռքից բաց չի թողնի նման նվերը: Մեր թիմը տիրեց նախաձեռնությանը և սկսեց մերթընդմերթ գրոհներ կազմակերպել: Տեմպը շատ ցածր էր, սակայն գյումրեցիներին շատ հաճախ հաջողվում էր հասնել մինչև մրցակցի տուգանային հրապարակ և լարվածություն ստեղծել: «Բնեյ Եհուդան» էլ կարողանում էր պարբերաբար օգտվել հակագրոհների հնարավորություններից և վտանգավոր պահեր ստեղծել: Մի դեպքում Մարինկովիչի հարվածից հետո մեր թիմին փրկեց դարպասաձողը: Այս պարագայում գյումրեցի մարզիչը դաշտ մտցրեց ևս մեկ հարձակվողի` Անդրանիկ Բարիկյանին` հույս ունենալով, որ վերջինս իր գործողություններով կկարողանա որոշել հանդիպման ելքը: Այդպես էլ պատահեց, Բարիկյանը որոշեց խաղի ելքը, սակայն գյումրեցիների համար ցավալի վերջաբանով: Հարձակվողը դաշտ մտնելուց 13 րոպե անց կոպիտ խաղաց մրցակցի պաշտպանի նկատմամբ և արժանացավ կարմիր քարտի: Խաղադաշտում կրկին թվային հավասարություն տիրեց, և իսրայելցի ֆուտբոլիստները հանգիստ շունչ քաշեցին: Ամեն դեպքում այս հեռացումը առանձնապես չակտիվացրեց խաղը: Շարունակվում էր նույն ծանր ֆուտբոլը, և տպավորությունը այնպիսին էր, որ «Բնեյ Եհուդան» արդեն բավականին հոգնել է և ուժեր չեն մնացել գրոհելու համար: «Շիրակն» էլ հետ քաշվեց և փորձեց ուղղակի խաղն ավարտել ոչ-ոքի արդյունքով: Խնդիրն այնքան էլ բարդ չէր, պետք էր ուղղակի խուսափել կոպիտ սխալներից և հետևողականորեն պաշտպանվել: Սակայն, դժբախտաբար, մեր ֆուտբոլիստները չկարողացան լուծել այդ խնդիրը: 82-րդ րոպեին մեր պաշտպանների անփույթ խաղի արդյունքում գնդակը չափազանց նպաստավոր դիրքում հայտնվեց Էնդլովուի մոտ և վերջինս չվրիպեց: Հետագա 11 րոպեներին «Շիրակը» խաղը փրկելու լուրջ քայլեր չձեռնարկեց: Ավելին, խաղային տարբեր դիրքերում տարրական սխալները շարունակվում էին, և ելքը չափազանց ցավալի ստացվեց: Խաղի ավելացրած վերջին րոպեին շիրակցիների պաշտպան Կադիո Բորիսը հասարակ իրադրությունում կորցրեց գնդակը և մրցակիցը վարպետորեն օգտվեց իրավիճակից: Մտնելով տուգանային հրապարակ` Էնդլովուն գնդակը փոխանցեց Գալվանին, որն էլ առանց խոչընդոտների վերջակետ դրեց հանդիպմանը: Արդյունքը չափից դուրս հիասթափեցնող էր, հատկապես նման խաղի համար:

Հետադարձ հայացք գցելով խաղին, պետք է նշել, որ ելքը արդարացի էր, իսկ հաշիվը` ոչ: «Շիրակը» իրականում պարտվեց մրցակցին, որովհետև խաղի ընթացքում թիմը հաղթելու լուրջ հավակնություններ չներկայացրեց, չնայած որ իրավիճակը ավելի քան նպաստավոր էր:

Վերլուծելով պարտության պատճառները` կարելի է առանձնացնել երկու կարևոր հանգամանք.
1. «Շիրակի» անտեսված մարտավարությունը: «Շիրակը» Թել-Ավիվում չխաղաց իր ֆուտբոլը, և դրա մեղավորը ոչ թե մարզիչն էր, այլ հիմնականում ֆուտբոլիստները: «Շիրակի» միջին գծի խնդիրների մասին խոսել էինք դեռ «Ռուդարի» հետ Գյումրիում կայացած մրցավեճից հետո, և այդ խնդիրները առկա էին նաև այս խաղում: «Շիրակը» առաջին կեսում հետ քաշված էր խաղում, սակայն այս պարագայում թիմին բնորոշ սուր հակագրոհները այդպես էլ տեղի չունեցան, չնայած որ Բիչախչյանը հենց դրա համար էր դաշտ դուրս բերել արագաշարժ սևամորթ հարձակվողների եռյակին: Այս դեպքում կարելի է կարծել, որ ֆուտբոլիստները դաշտ էին դուրս եկել ոչ-ոքի խաղալու համար, ինչը անընդունելի է, քանի որ խաղի նախնական «հետախուզական» հատվածից հետո ակնհայտ էր, որ մրցակիցը ամենևին էլ ահարկու չէ: Երկրորդ կեսում «Շիրակն» արդեն, ստեղծված պայմաններից ելնելով, պարտավոր էր գրոհել, սակայն մեր թիմը չէր գործում իրեն հատուկ եզրային սուր անցումների և տուգանային փոխանցումներ կատարելու տարբերակով, այլ փորձում էր կենտրոնում խաղարկել գնդակը և ինչ-որ կերպ ուղի գտնել դեպի դարպասը, որը ակնհայտորեն «Շիրակի» ֆուտբոլը չէր: Բարիկյանի հեռացումից հետո էլ «Շիրակը» կարծես թե լավ վերադասավորվեց պաշտպանությունում, սակայն առաջին գոլի հետ կապված անհեթեթ դրվագից հետո ամեն ինչ փլվեց, և նման արդյունքը դարձավ անխուսափելի:
2. Հայկական ֆուտբոլային հիվանդություն: Ինչպես գրեթե բոլոր հայկական թիմերի մոտ է, գյումրեցիներն էլ եվրագավաթային այս հանդիպմանը աչքի ընկան չափազանց մեծ քանակությամբ անհեթեթ և անբացատրելի գործողություններով: Մի դեպքում ինքնագոլի փորձ եղավ, ավելի հաճախ կրկնվում էին սխալ փոխանցումները: Իսկ ամենաանհեթեթ պահերը բաժին ընկան «Շիրակի» քիչ թե շատ փորձառու և հուսալի ֆուտբոլիստներին: Դժվար էր ըմբռնել, թե ինչ կարիք կար նման կերպ խաղալու մրցակցի պաշտպանի դեմ, որի համար Բարիկյանը պատժվեց կարմիր քարտով: Նույն կերպ հիասթափեցրեց գյումրեցիների պաշտպանությունում ամբողջ մրցաշրջանում ամենահուսալի և ամենակայուն ֆուտբոլիստ համարվող Կադիո Բորիսը, ով հասարակ իրադրությունում կորցրեց գնդակը և դա հանգեցրեց երկրորդ գնդակին: Իհարկե, չպետք է մոռանալ եվրագավաթում հանդես գալու հետ կապված մեծ լարվածությունը, ինչպես նաև մրցակցի հարկի տակ խաղալու գործոնը, սակայն մի բան պարզ է` Գյումրիում այդպիսի խաղը երկրպագուները չեն ների «Շիրակի» ֆուտբոլիստներին:

Ինչևէ, պատասխան խաղից առաջ իրավիճակը շատ անբարենպաստ է, սակայն մյուս կողմից էլ մրցակիցը այնպիսին չէ, որին անհնար է երկու գոլ խփել: Գյումրիում «Շիրակի» ֆուտբոլիստներին պետք է կենտրոնանալ և հավատալ սեփական ուժերին, իսկ երկրպագուների աջակցության պակաս նրանք հաստատ չեն ունենա: Ի վերջո, այս իրավիճակից մեր թիմին կարող է դուրս բերել միայն  ֆուտբոլային խարիզման և գյումրեցուն հատուկ թասիբը, որին անվերապահորեն պետք է հավատան թե ֆուտբոլիստները, և թե գյումրեցի երկրպագուները: 

Read more »

Մեր թիմերի մրցակիցները Եվրոպա լիգայում. Մաս-2` "Սերվետ"

Եվրոպա լիգայի որակավորման երկրորդ փուլում Կապանի "Գանձասարին" բաժին է ընկել բավականին հայտնի մրցակից` Շվեյցարիան ներկայացնող "Սերվետ" ակումբը: "Սերվետը" ունի հարուստ ֆուտբոլային պատմություն: Թիմը ստեղծվել է 1890թ., երբ ֆուտբոլը նոր էր սկսել տարածվել եվրոպական մայրցամաքում: Ժնև քաղաքը ներկայացնող թիմը եղել է Եվրոպայում կազմակերպված առաջին ֆուտբոլային մրցաշարերից մեկի` Torneo Internazionale Stampa Sportiva /Սպորտային լրատվության միջազգային մրցաշար/ հաղթողը` 1908-ին: 1930-ին "Սերվետը" նախաձեռնել է Ազգերի գավաթը, որը հանդիսացել է այժմյան Չեմպիոնների լիգայի նախատիպը: Շվեյցարական թիմի ոսկե մրցաշրջանը 1978-79-նն էր, երբ թիմը հաղթել է իր մասնակցած բոլոր մրցաշարերում` բացառությամբ Գավաթակիրների գավաթի: 

Թիմը 17 անգամ նվաճել է Շվեյցարիայի չեմպիոնի կոչումը, վերջին անգամ` 1998-99 մրցաշրջանում: 12 անգամ "Սերվետը" եղել է երկրորդը, 7 անգամ երրորդը: Թիմը բավականին հաջող է հանդես եկել նաև Շվեյցարիայի գավաթի խաղարկությանը` 19 մասնակցած եզրափակիչներից 7-ում հաղթելով և նվաճելով տիտղոսը:

Չնայած այսպիսի փառավոր անցյալին` թիմի վերջին տարիների պատմությունը աղմկոտ է և տխուր: 2005-ին թիմը կուտակած 10 մլն շվեյցարական ֆրանկ պարտքի ծանրությանը չդիմացավ և սնանկ հայտարարվեց: "Սերվետը" 6 տարի անցկացրեց շվեյցարական երրորդ և երկրորդ դիվիզիոններում և միայն 2011-12 մրցաշրջանից կարողացավ վերադառնալ շվեյցարական Սուպեր լիգա: Ներգրավելով մի քանի նոր խաղացողների և բավականին հայտնի սպորտային տնօրենի` ի դեմս պորտուգալացի նախկին ֆուտբոլիստ Կոշտինյայի` վերադարձի հենց առաջին տարում "Սերվետը" գրավեց չորրորդ տեղը Սուպեր լիգայում և իրավունք ստացավ մասնակցելու Եվրոպա լիգայի խաղարկությանը:

"Սերվետ" ակումբը հայ ֆուտբոլասերներին ծանոթ է նաև այն պատճառով, որ 2003-04 մրցաշրջանում այնտեղ է հանդես եկել Հայաստանի հավաքականի պաշտպան Հարություն Վարդանյանը: Գյումրեցին այնտեղ անցկացրել է 28 խաղ, սակայն մյուս մրցաշրջանում լքել է ակումբը:

Եվրագավաթներում խաղալու փորձի առումով նույնպես "Սերվետը" թվացյալ առավելություն ունի, քանի որ թիմը 28 անգամ մասնակցել է եվրոպական տարբեր ակումբային մրցաշարերի: Սակայն եթե նկատի ունենանք, որ շվեյցարական թիմը վերջին անգամ եվրագավաթների մասնակցել է 2004 թվականին, կարելի է ասել, որ մեր ներկայիս թիմը առավել փորձառու է:

2004-ին "Սերվետը" Ուեֆայի գավաթի որակավորման երկրորդ փուլում զիջել է Հունգարիան ներկայացնող "Ույպեստ" ակումբին` տանը 0:2 և մրցակցի դաշտում 1:3 հաշիվներով: Դրանից առաջ, 2002-ին, "Սերվետը" Ուեֆայի գավաթի որակավորման առաջին փուլում երկու խաղերի արդյունքում ընդհանուր 5:0 (3:0, 0:2) հաշվով ջախջախել է Հայաստանը ներկայացնող "Սպարտակ" ակումբին: Հաջորդ փուլում արդեն "Սերվետը" երկու խաղերի արդյունքում տանն ընդունած մեկ ավել գնդակի պատճառով զիջել է հետագա պայքարը լեհական "Ամիկային": Իսկ եվրալիգաների ամենահաջող փորձը 2001-02թթ. Ուեֆայի գավաթի խաղարկությունում էր, որտեղ "Սերվետը" ընթացքում հաղթահարելով չեխական "Սլավիայի", իսպանական "Սարագոսայի", գերմանական "Հերտայի" արգելքները, հասել է մինչև 1/16 եզրափակիչ, որտեղ միայն զիջել է իսպանական "Վալենսիային": Սրանք են եվրագավաթներում "Սերվետի" վերջին փորձերը, որոնք արժանի են հիշատակման: Ամեն դեպքում այս տարիների ընթացքում թիմում փոխվել է գրեթե ամեն ինչ, և եվրագավաթներին մասնակցության վերոհիշյալ փորձը չի կարելի համարել առաջիկա հանդիպման վրա ազդող կարևոր գործոն:

"Սերվետի" պաշտպան Քրիստոֆեր Ռուտիսը

Կազմը:

"Սերվետի" կազմը առանձնապես  հնչեղ անուններ չունի: Ֆուտբոլիստների մեծ մասը շվեյցարացիներ են, լեգեոներները հինգն են: Դարպասապահը 25-ամյա իսպանական ծագումով շվեյցարացի Դավիդ Գոնսալեսն է, ով միջազգային ասպարեզում հանդիպումների փորձ չունի: Շվեյցարացիների պաշտպանությունում հիմնականում երիտասարդ ֆուտբոլիստներ են` Քրիտոֆեր Ռուտիս, Վինսենտ Ռեուլֆի, Ֆրանսուա Մուբանջե, Իսագա Դիալլո, Պատրիկ Բաուման և այլոք: Իհարկե այս անունները ֆուտբոլասերներին անծանոթ են, նշենք միայն, որ վերոհիշյալ պաշտպաններից միայն Վինսենտ Ռեուլֆին է երկու անգամ հրավիրվել Շվեյցարիայի ազգային հավաքական, այն էլ` ընկերական խաղերին: Կիսապաշտպանությունում շվեյցարական թիմի առաջատարը բրազիլացի հարձակողական ոճի կիսապաշտպան Անտոնիո Մարկոս դե Ազեվեդոն է: Վերջինս նախորդ մրցաշրջանում դարձել է 7 գոլի հեղինակ` միաժամանակ հանդիսանալով գրոհների հիմնական կազմակերպիչը` 6 գոլային փոխանցումներով: Մյուս կիսապաշտպանների թվում արժե նշել կոտ դ'իվուարցի Լեգլե Խավիեր Կուասսիին, Լիոնել Պիզինատին, Տիբեր Պոնտին: Հարձակման գծում "Սերվետի" առաջատարն է սերբական ծագում ունեցող Գորան Կարանովիչը, ով նախորդ մրցաշրջանում խփել է 8 գնդակ: Մյուս հարձակվողներն են Տերի Մուտինյոն, Ջուլիան Էստեբանը և պորտուգալացի երիտասարդ ֆուտբոլիստ Դանիել Սոարեսը: Շվեյցարացիների ամենաթանկ տրանսֆերային արժեք ունեցող ֆուտբոլիստը կիսապաշտպան Լեգլե Խավիեր Կուասսին է, ում տրանսֆերը գնահատվում է 1.250.000 եվրո: Իսկ թիմի ընդհանուր տրանսֆերային արժեքն է 9.8 մլն եվրո:

Ինչպես տեսնում ենք, "Սերվետը" առանձնապես փորձառու և ուժեղ ֆուտբոլիստներով աչքի չի ընկնում: Հաշվի առնելով նաև շվեյցարական թիմի նոր վերադարձը եվրոպական մրցասպարեզ, կարելի է ասել, որ "Գանձասարը" մրցակցի ընտրությունից բողոքելու փաստարկներ առանձնապես չունի:

Գորան Կարանովիչը խաղընկերների հետ տոնում է իր հերթական գոլը

Մարզիչը` Ժոաո Ալվես

Պորտուգալացի մարզիչը "Սերվետի" ղեկը ստանձնել է մոտ մեկ տարի առաջ, սակայն ընթացքում մի քանի ամիս մարզչական աշխատանքը վստահված է եղել մեկ այլ պորտուգալացու` Ժոաո Պերեյրային: Ժոաո Ալվեսի որոք թիմն անցկացրել է 21 խաղ, որից հաղթել է 10-ում, 4-ն ավարտել է ոչ-ոքի, և 7-ում էլ պարտություն է կրել: Ժոաո Ալվեսը 60-ամյա պորտուգալացի մասնագետ է, ով նախկինում մարզել է պորտուգալական մի շարք ակումբներ` այդ թվում` "Բոավիշտան", "Գիմարաեշը", "Ակադեմիկա դե Կոիմբրան" և իսպանական "Սալամանկան", որին կարողացել է Սեկունդայից վերադարձնել Լա Լիգա: Առավել աչքի ընկնող արդյունքներ Ալվեսը գրանցել է որպես ֆուտբոլիստ, "Բենֆիկայի" և "Բոավիշտայի" հետ երկուական անգամ նվաճել է Պորտուգալիայի գավաթը և երկու անգամ էլ Պորտուգալիայի չեմպիոն է դարձել "Բենֆիկայի" կազմում: Պորտուգալացին մասնակցել է հավաքականի 36 խաղերի և խփել 3 գնդակ:

"Սերվետի" մարզիչ Ժոաո Ալվեսը

Մարզադաշտը` "Ստադ դե Ժնև"
Վերադառնալով շվեյցարական բարձրագույն լիգա` 2011-ից "Սերվետը" սկսեց իր հանդիպումներն անցկացնել "Ստադ դե Ժնև" մարզադաշտում, որը Եվրո-2008-ն ընդունած մարզադաշտերից մեկն է և տեղավորում է ավելի քան 30,000 երկրպագու:

"Ստադ դե Ժնև"

Ամփոփելով` պետք է նշել, որ Կապանի "Գանձասարը" կարող է արժանի պայքարել այս մրցակցի դեմ և նույնիսկ հաջորդ փուլ անցնել: Այստեղ կապանցիները ավելի շուտ պետք է լուծեն ներքին խնդիրները, քան թե մտածեն մրցակցին դիմակայելու մասին: Այսօրվա հանդիպումը կարող է մի շարք հարցերում պարզություն մտցնել, սակայն հուսանք, առավել որոշիչ կլինի Հայաստանում կայանալիք պատասխան խաղը: 

Read more »

450 րոպե եվրագավաթներում առանց գոլի

5 խաղ եվրագավաթներում և ոչ մեկում գոլի հեղինակ չդառնալ, դա, մեղմ ասած, չի խոսում թիմի բարձր կարգի մասին: Եվ ցավալի է, որ այդ թիմը Հայաստանի չեմպիոն "Ուլիս" ակումբն է: Մինչ այսօրվա խաղը "Ուլիսը" 2010-11 թվականների մրցաշրջանում խաղացել է Եվրոպա լիգա խաղարկությունում և հենց առաջին փուլում 2 խաղերի արդյունքում զիջել է "Շիրակի" այժմյան մրցակից Թել Ավիվի  "Բնեյ Եհուդա" ակումբին: Հիշեցնենք, որ երևանյան մրցավեճը ավարտվեց ոչ ոքի 0:0 հաշվով, իսկ մեկ շաբաթ անց էլ Թել Ավիվում "Ուլիսը" զիջեց 0:1 հաշվով: 2011-12 թվականներին էլ "Ուլիսը" նորից դուրս եկավ Եվրոպա լիգա խաղարկության առաջին փուլ և հանդիպեց Հունգարիան ներկայացնող "Ֆերենցֆարոշ" ակումբին: Մրցակցի հարկի տակ "Ուլիսը" զիջեց 0:3 հաշվով, իսկ սեփական հարկի տակ էլ "Ուլիսը" զիջեց 0:2 հաշվով: Իսկ ահա երբ 2011 թվականին էլ "Ուլիսը" հաղթեց Հայաստանի առաջնությունում, իրավունք վաստակեց խաղալու Չեմպիոնների լիգայի 2-րդ փուլի խաղերին: Եվ ահա 2012-13 թվականներին Չեմպիոնների լիգայում Հայաստանի չեմպիոն "Ուլիսի" մրցակիցը հայ ֆուտբոլասերներին քիչ թե շատ ծանոթ մրցակից Մոլդովայի չեմպիոն "Շերիֆ" ակումբն էր: Հիշեցնենք, որ 2006-07 թվականների Չեմպիոնների լիգայի 1-ին փուլում Տիրասպոլի  "Շերիֆի" մրցակիցը Երևանի մեկ այլ ակումբ "Փյունիկն" էր: Առաջին խաղն Երևանում ավարտվեց ոչ ոքի 0:0 հաշվով, իսկ պատասխան խաղում "Շերիֆը" կարողացավ առավելության հասնել "Փյունիկի" նկատմամբ` հաղթելով 2:0 հաշվով: Բայց պետք է նշենք, որ այն ժամանակվա "Շերիֆն" ավելի ուժեղ էր և հագեցած էր ավելի բարձրակարգ լեգեոներներով: Դե այն, որ "Շերիֆն" ավելի շատ փորձ ունի եվրագավաթներում խաղալու, իհարկե, այդտեղ ոչ ոք չի վիճում, սակայն դա չի նշանակում, որ պետք է դա մեզ դրոշակ ընդունենք և փաստենք, որ "Շերիֆն" անկասելի մրցակից է: Մինչխաղային մամուլի ասուլիսում "Շերիֆի" գլխավոր մարզիչ Միլան Միլանովիչը առավել քան վստահ էր, որ իր թիմն անպայման անցնելու է "Ուլիսի" արգելքը, իսկ ահա "Ուլիսի" գլխավոր մարզիչ Սևադա Արզումանյանն էլ ասեց, որ թիմերը խաղալու են հավասար 11 ֆուտբոլիստներով, ու 2 թիմերի հնարավորությունները գնահատեց հավասար: Խաղից առաջ "Ուլիսն" ուներ դարպասապահի դիրքի և կենտրոնական կիսապաշտպանի դիրքի ուժեղացման կարիք, այդ իսկ պատճառով թիմ հրավիրվեցին Հայաստանի հավաքականի թեկնածու 2 ֆուտբոլիստներ "Միկայից"` դարպասապահ` Գևորգ Կասպարովին, և կենտրոնական կիսապաշտպան Աղվան Մկրտչյանին: Սակայն մինչ հանդիպումը 2 ֆուտբոլիստներն էլ վնասվածք ստացան և չկարողացան օգնել "Ուլիսին": Սակայն, պետք է նշել, որ Էդուարդ Հովհաննիսյանը աչքի ընկավ դարպասապահի հուսալի խաղով, իսկ կենտրոնական կիսապաշտպանի դիրքն էլ փորձեց փակել թիմի ավագ Դավիթ Գրիգորյանը: Այժմ անդրադառնանք Երևանում կայացած հանդիպմանը:

Գնդակի համար պայքարում է Արտակ Գրիգորյանը

      Ժամը 19-ին Երևանի Վազգեն Սարգսյանի անվան "Հանրապետական" մարզադաշտում, հունգարացի մրցավար Տամաշ Բոգնարը ազդարարեց հանդիպման սկիզբը: "Ուլիսը" միանգամից անցավ գրոհների ու արդեն 2-րդ րոպեին իրավունք ստացավ տուգանային խաղարկելու: Իսկ ահա 7-րդ րոպեին էլ խառնաշփոթ իրավիճակ եղավ "Շերիֆի" տուգանային հրապարակում, բայց "Ուլիսը" չկարողացավ գրավել մրցակցի դարպասը: Առաջին խաղակեսի 15 րոպեներից հետո խաղի թելը հետզհետե անցավ "Շերիֆի" ձեռքը: 22-րդ րոպեին, երբ կոպիտ կերպով սխալվեց "Ուլիսի" կենտրոնական պաշտպան Միխել Սիմոնյանը, գնդակն ուղղակի հրաշքով չհայտնվեց "Ուլիսի" դարպասում. օգնության հասավ դարպասաձողը: Իսկ ահա 30-րդ րոպեին էլ, ևս մեկ անգամ բախտը ժպտաց երևանցի ֆուտբոլիստներին, և նորից գնդակը չհայտնվեց "Ուլիսի" դարպասում: Սերգեյ Գեորգիևը, միայնակ մնալով դաևրպասապահի դեմ դիմաց, չկարողացավ գրավել Հովհանիսյանի պաշտպանած դարպասը: 35-րդ րոպեից հետո խաղը նորից թեքվեց "Ուլիսի" կողմը: Իսկ 41-րդ րոպեին էլ "Ուլիսն" ունեցավ այս խաղում իր միակ ռեալ հնարավորությունը աչքի ընկնելու, սակայն Շոթա Ջիկիան, խաբս տալով "Շերիֆի" 2 պաշտպանների, շատ վտանգավոր հարված կատարեց  սուր անկյունից դեպի վերևի ձախ անկյունը. գնդակը ցնցեց դարպասաձողը և չհայտնվեց "Շերիֆի" դարպասում: Առաջին խաղակեսում այդպես էլ հաշիվը չբացվեց: 2-րդ խաղակեսն սկսվեց "Շերիֆի" գրոհների նշանաբանով: Եվ ահա "Շերիֆի" ստանդարտների հիմնական իրականացնող Մարիան Մարիանովիչը 59-րդ րոպեին, երբ իրացրեց անկյունային հարված գնդակը նորից "Ուլիսի" ֆուտբոլիստներից դուրս եկավ անկյունային:  60-րդ րոպեին էլ "Շերիֆի" սերբ կիսապաշտպան Մարիանովիչի իրականացրած հերթական անկյունայինը խոցեց հայկական ֆուտբոլի "աքիլեսյան գարշապարը", և տուգանային հրապարակի խառնաշփոթ իրավիճակից օգտվեց Տիրասպոլը ներկայացնող ակումբի 21-ամյա մոլդովացի կիսապաշտպան Սերգեյ Գեորգիևը` դիպուկ հարվածով բացելով հանդիպման հաշիվը: Գոլից անմիջապես հետո, Սևադա Արզումանյանը միանգամից կատարեց 2 փոփոխություն` խաղադաշտ դուրս բերելով Արտյոմ Ադամյանին և Արամ Բարեղամյանին, որոնք փոխարինեցին համապատասխանաբար Արսեն Բալաբեկյանին և քիչ թե շատ աչքի ընկնող ֆուտբոլիստ` բրազիլացի Արագոնեյ Սանթոսին: Սակայն, պետք է նշել, որ կատարված փոփոխությունները բեկում չմտցրեցին խաղի մեջ և "Ուլիսը", սեփական հարկի տակ զիջելով մրցակցին, պատասխան խաղից առաջ հայտնվեց դժվարին կացության մեջ: Շերիֆցիներից հիանալի խաղ ցուցադրեց բուլղարացի դարպասապահ Վլադիմիր Ստոյանովը,  շատ ակտիվ էր կոտ դ'իվուարցի աջ պաշտպան Մարսել Մետուան, իսկ "Ուլիսի" պաշտպաններին անընդհատ լարվածության մեջ էին պահում Սերգեյ Գեորգիևը, և 21-ամյա բոլիվիացի հարձակվող Դարվին Ռիոսը:

     Հատկանշական է, որ "Ուլիսը" խաղին ներկայացավ կարճ պահեստայինների նստարանով:  Պատկերացրեք, որ Չեմպիոնների լիգայի խաղարկությունում "Ուլիսի" պահեստայինների թվում էին հայտնվել Օրբելի Համբարձումյանը և Հովհաննես Մաճկալյանը, որոնք անգամ Հայաստանի առաջնությունում հանդես գալու շատ քիչ փորձ ունեն, ուր մնաց, թե հանդես գային Չեմպիոնների լիգայի մրցաշարում: Կարծում ենք` պահեստայինների նստարանից միայն կարող էին օգնության հասնել Արտյոմ Ադամյանը և Արամ Բարեղամյանը, որոնք եվրագավաթներում հանդես գալու փորձ ունեին: Ինչպես վերը նշեցինք` "Ուլիսին" չկարողացան օգնել դարպասապահ Գևորգ Կասպարովը և կիսապաշտպան Աղվան Մկրտչյանը: Բացի այս ֆուբոլիստներից, "Ուլիսից" վնասվածքներ ունեին պաշտպան` Արտակ Անդրիկյանը, պաշտպանողական ոճի կիսապաշտպան` Վահագն Մինասյանը և հարձակվող` Ալբերտ Թադևոսյանը: Եվ ահա այսքան խնդիրների առկայության պարագայում, "Ուլիսի" գլխավոր մարզիչ Սևադա Արզումանյանը ստիպված էր վերացնել նշված խնդիրները: Սևադա Արզումանյանի մարզչական գիտելիքների վրա, բնականաբար, ոչ ոք չի էլ կասկածում, և միայն այն փաստը, որ նա "Ուլիսի" հետ անցյալ մրցաշրջանում հասել է Հայաստանի չեմպիոնի կոչմանն` արդեն իսկ, շատ բանի մասին է խոսում: Այսօրվա խաղում Սևադա Արզումանյանը ստիպված էր վերադասավորումներ կատարել, վերոնշյալ ֆուտբոլիստների բացակայության պայմաններում: Արդեն խոսեցինք դարպասապահի խնդրի մասին, և մարզիչը ստիպված էր ընտրություն կատարել Էդուարդ Հովհաննիսյանի և Մանվել Աֆրիկյանի միջև, և կարծում ենք` շատ ճիշտ որոշում կայացրեց խաղադաշտ դուրս բերելով Էդուարդ Հովհանիսյանին: Աջ պաշտպանի դիրքում հանդես էր գալիս Նորայր Սահակյանը, որը այդ դիրքում սկսել է հանդես գալ Հայաստանի 2012-13 թվականների առաջնությունից սկսած, մինչ այդ այս ֆուտբոլիստը հանդես էր գալիս աջ եզրային կիսապաշտպանի դիրքում: Պաշտպանության կենտրոնում գործում էին Միխել Սիմոյանը և Թենգիզ Ուգրեխելիձեն: Վերջինս չեմպիոն դարձած "Ուլիսի" կազմում հանդես էր գալիս հենց աջ պաշտպանի դիրքում, սակայն կենտրոնական պաշտպան Տիգրան Հախնազարյանի անվստահ խաղի հետևանքով, Ուգրեխելիձեն հայտնվեց կենտրոնական պաշտպանի դիրքում: Ձախ պաշտպանի դիրքում հանդես էր գալիս Նորայր Գրիգորյանը, որը մինչ այս խաղում էր աջ պաշտպանի դիրքում. սա էլ ձախ պաշտպան` Արտակ Անդրիկյանի, բացակայության հետևանքն էր: Հենակետային կիսապաշտպանի դիրքում հանդես էր գալիս Արտակ Գրիգորյանը, որը "Ուլիսում" ավելի շատ գործում էր կենտրոնական կիսապաշտպանի դիրքում, իսկ հենակետայինի դիրքն էլ զբաղեցնում էր Գեորգի Կրասովսկին, որը ևս լքել է "Ուլիսը": Կենտրոնական կիսապաշտպանի դիրքը զբաղեցնում էր թիմի ավագ Դավիթ Գրիգորյանը, որը նոմինալ ձախ կիսապաշտպան է: Ձախ եզրայինի դիրքում հանդես էր գալիս վրացի Շոթա Ջիկիան, որը ավելի լավ է գործում կենտրոնում: Ենթահարձակվողի դիրքում խաղում էր Արագոնեյ Սանթոսը, որը ցուցաբերեց ակտիվություն, սակայն ունիվերսալ այս կիապաշտպանը ավելի լավ է գործում կենտրոնական կիսապաշտպանի դիրքում: Աջ եզրայինի պարտականությունները կատարում էր կոնգոցի Լիե Պատոն, որը ակտիվ է ընդամենը մեկ խաղակես, իսկ առաջ քաշված հարձակվողի դիրքում էլ ընտրություն չունենալու պատճառով խաղում էր Արսեն Բալաբեկյանը. այստեղ էլ երևի զգացվեց Ալբերտ Թադևոսյանի վնասվածքը: Կարծում ենք ֆուտբոլիստների ընտրություն չունենալու հետևանքն էր պատճառը, որ "Ուլիս" ակումբը չկարողացավ հաղթել Տիրասպոլի "Շերիֆին", որի մարզիչն ունի ֆուտբոլիստների ընտրության լայն հնարավորություն, և պահեստայինների երկար նստարան: Կարծում ենք` Հայաստանի չեմպիոն դարձած թիմը, որը ներկայանում է Չեմպիոնների լիգայի խաղարկությանը, յուրաքանչյուր դիրքում պետք է ունենա առնվազն 2 հավասարազոր ֆուտբոլիստ, ինչը այսօր բացակայում է "Ուլիսում":

Ջիկիայի վտանգավոր հարվածը

     Սեփական հարկի տակ "Շերիֆին" 0:1 հաշվով պարտվելուց հետո,  պատասխան խաղից առաջ "Ուլիսին" հաջորդ փուլ անցնելու շատ քիչ շանսեր են մնացել, սակայն հույս ունենանք, որ Հայաստանի չեմպիոնը կկարողանա Մոլդովայում վերացնել եվրագավաթների գոլային "երաշտը" և կկարողանա անցնել հաջորդ փուլ: Հիշեցնենք, որ պատասխան հանդիպումը կայանալու է Մոլդովայում` Տիրասպոլի  13.300 հանդիսական տեղավորող "Շերիֆ" մարզադաշտում, հուլիսի 24-ին:     

     

Read more »