Լոնդոն-2012. Մեքսիկայի հավաքականը նվաճեց օլիմպիական ոսկին

Մեքսիկայի հավաքականը դառնում է օլիմպիական չեմպիոն, իսկ բրազիլական «ոսկե» երիտասարդությունը տուն կվերադառնա ընդամենը արծաթե մեդալներով. Գոլիզեում բլոգը ամփոփում է լոնդոնյան օլիմպիադայի ֆուտբոլի մրցաշարը:

Վաղն արդեն 30-րդ ամառային օլիմպիական խաղերը կդառնան պատմություն, իսկ մեքսիակացի ֆուտբոլիստները մի փոքր շտապեցին ու կերտեցին իրենց պատմությունն այսօր: Մեքսիկայի հավաքականի հաղթանակը անակնկալ էր համարվում մրցաշարից առաջ, սակայն մեքսիկացիների մի քանի խաղերից հետո պարզ դարձավ, որ այս թիմը հսկայական ներուժ ունի, որը կբավարարի նույնիսկ ոսկե մեդալների համար: Բրազիլիան այս անգամ էլ չկարողացավ նվաճել օլիմպիական ոսկին, և ստիպված է սպասել տնային օլիմպիադային` Ռիո դե Ժանեյրոյում: Իսկ բրոնզե մեդալները բաժին հասան կորեացիներին, ովքեր երեկ կարողացան առավելության հասնել ճապոնացիների նկատմամբ: 

3-տեղի համար խաղ.

Հարավային Կորեա 2-0 Ճապոնիա

1-0` Պակ Չու Յուն (38'), 2-0` Կու Չա-Յոլ (58')

Հարավային Կորեայի հավաքականը վստահ հաղթանակ տարավ ճապոնացիների նկատմամբ` երկու անպատասխան գնդակ ուղարկելով մրցակցի դարպասը: Ասիական երկու թիմերը հիանալի մրցաշար անցկացրեցին, դրսևորեցին իրենց որպես կազմակերպված և մեծ ապագա ունեցող թիմեր, որոնք հետագայում աննկատ չեն մնա նաև առավել պրոֆեսիոնալ և լուրջ առաջնություններում, մասնավորապես 2014-ին` Բրազիլիայում:

Եզրափակիչ`

Բրազիլիա 1-2 Մեքսիկա

0-1` Պերալտա (1'), 0-2` Պերալտա (75'), 1-2` Հալկ (90')

Բրազիլիան սկսեց խաղը ֆավորիտի կարգավիճակով, սակայն այդ կարգավիճակը պահպանել կարողացավ ընդամենը 30 վայրկյան: Հենց այդքան պահանջվեց մեքսիկացիներից հաշիվը բացելու համար: Ռաֆայելի` անհաջող հետ փոխանցումից հետո գնդակը հասավ Օրիբե Պերալտային, ով դիպուկ հարվածով գրավեց դարպասը: Առաջին րոպեին ընդունած գնդակը առանձնապես չանհանգստացրեց բրազիլացիներին: Նրանք այս մրցաշարում արդեն երկու անգամ արագ գնդակ էին ընդունել, սակայն հետագայում կարողացել էին հաղթանակ տանել: Այս անգամ էլ Նեյմարն ու թիմակիցները չշտապեցին գրոհի նետվել, այլ խաղարկում էին գնդակը և սպասում հարմար պահի: Եվ միայն բրազիլացիների մարզիչ Մանո Մենեզեսի «պրոֆեսիոնալ» աչքը նկատեց, որ այդ հարմար պահը այդպես էլ չի գա, քանի որ մեքսիկացիները շատ հուսալի են պաշտպանվում: Մենեզեսը արդեն 30-րդ րոպեին մարտի նետեց Հալկին, որից հետո միայն բրազիլացիները կարողացան որոշ վտանգավոր պահեր ստեղծել: Հիշատակման արժանի են Հալկի կրակոցը հեռվից և Մարսելոյի շեղ հարվածը հարմար դիրքից: 

Երկրորդ կեսի սկզբնամասում բրազիլացիները բավականին ակտիվ էին, հատկապես ջանասիրաբար էին պայքարում Նեյմարը և Հալկը: Սակայն խաղակեսի միջնամասում մեքսիկացիները կարողացան խաղը տանել մրցակցի կիսադաշտ և նույնիսկ վտանգավոր պահեր ունենալ: Մի դեպքում Պերալտան նույնիսկ գրավեց դարպասը, սակայն` խաղից դուրս վիճակից: Մի քանի րոպե անց նույն Պերալտան տուգանայինի խաղարկումից հետո գլխի հարվածով կրկնապատկեց հաշիվը` դառնալով խաղի հերոսը: Բրազիլացիների վիճակը ավելի ծանրացավ. երկու գոլի առավելությունը հետ բերելը իրոք շատ դժվար էր, քանի որ մեքսիկացիները գործում էին շատ գրագետ և ուղղակի բրազիլացիներին հնարավորություն չէին տալիս խաղալու իրենց ֆուտբոլը: Ազատ տարածքները շատ քիչ էին, իսկ առանց դրա բրազիլացիներն անկարող եղան լուրջ վտանգ ստեղծել մրցակցի դարպասին: Բրազիլացիների միակ հաջող գրոհը ձեռնարկվեց խաղի վերջին րոպեին, և Հալկը վարպետորեն օգտագործեց հնարավորությունը: Ավելացրած ժամանակում շատ լավ հնարավորություն ստացավ Օսկարը, սակայն նրա գլխով հարվածը շեղ էր: Մարկ Կլատենբուրգի սուլիչից հետո արդեն մեքսիկացիները ցնծում էին, քանի որ հաղթել էին օլիմպիական ոսկին, և հաղթել էին արժանիորեն: 

Բրազիլիայի հավաքականը մրցաշարի ողջ ընթացքում համարվում էր չեմպիոնի գլխավոր հավակնորդը, և հեշտությամբ իրար ետևից հաղթում էր իր բոլոր մրցակիցներին: Արդյունքում հենց այդ թեթևությունը չար խաղ խաղաց բրազիլացիների հետ, որովհետև ծանր պահին արդեն նրանք չկարողացան հավաքվել և իրականում փոխել խաղի ընթացքը իրենց օգտին: Հենց այդ` ինչ-որ բան փոխելու կարողությունն է սովորական ֆուտբոլիստներին դարձնում հերոսներ, այլ ոչ թե խաբքերի մեծ հավաքածուն կամ գոլառատ ֆուտբոլը թույլ մրցակիցների դեմ: Արդյունքում` մեքսիկացիները հերոսներ են, և դա ապացուցում են նաև իրենց կրծքին հայտնված ոսկե մեդալները, իսկ բրազիլացիները` ընդամենը վառ աստղեր: 

Զուտ ֆուտբոլային առումով նույնպես բրազիլացիները զիջեցին մեքսիկացիներին: Բրազիլացիների հեշտ հաղթանակները թույլ չէին տալիս նկատել թիմում առկա խնդիրները և մրցաշարի ընթացքում շտկել դրանք: Իսկ խնդիրները մեծ մասամբ պաշտպանությունում էին: Մինչ եզրափակիչ խաղը բրազիլացիները 5 գնդակ էին ընդունել, ինչը իրոք շատ է նման մակարդակի թիմի համար: Հարձակման գծում էլ, բրազիլացիների «Պլան Ա»-ն միշտ տալիս էր իր արդյունքը երեք գոլերի տեսքով, և ուրեմն «Պլան Բ» պետք չէր: Պարզվեց` պետք էր, սակայն վերջին խաղում դա մշակել կամ խաղարկել «պենտակամպիոնները» չհասցրեցին: Ինչ վերաբերում է մեքսիկացիներին, պետք է նշել, որ Տենայի թիմը շատ հաշվեկշռված և խելացի ֆուտբոլ էր խաղում` հավասարապես արդյունավետ գործելով բոլոր գոտիներում: Պաշտպանությունը ղեկավարում էր վետերան Սալսիդոն` մի խումբ երիտասարդ «զինվորներով», խաղը առջևի գծում կազմակերպում էր Մարկո Ֆաբիանը, իսկ գրոհները եզրափակում էին Դոս Սանթոսը կամ Պերալտան: Թիմը տակտիկապես գերազանց էր գործում, կարողանում էր իր ձեռքում պահել խաղի ընթացքը, բացի այդ երկրպագուներին նույնպես ձանձրանալու առիթ չէր տալիս: Արդյունքում մեքսիկացիները պարգևատրվում են ոսկե մեդալներով մի այնպիսի հետաքրքիր մրցաշարում, ինչպիսին օլիմպիական խաղերն են:

Ավարտվեց օլիմպիական ֆուտբոլի մրցաշարը` թողնելով շատ վառ հիշողություններ և բազմաթիվ նոր անուններ, որոնց հետագայում կհանդիպենք ֆուտբոլային աշխարհում: Շնորհակալ ենք, որ հետևեցիք Լոնդոնյան խաղերին «Գոլիզեում» բլոգի հետ:

Read more »

Լոնդոն-2012. Ֆուտբոլի մրցաշարի կիսաեզրափակիչ փուլի տեսություն

Բրազիլացիները հերթական երեք գնդակներն են խփում և պատրաստվում նույնը կրկնել եզրափակիչում Մեքսիկայի դեմ, իսկ ասիական թիմերը կպայքարեն ընդամենը բրոնզե մեդալի համար. "Գոլիզեում" բլոգը ամփոփում է օլիմպիական խաղերի ֆուտբոլի մրցաշարի կիսաեզրափակիչները:

Լոնդոն-2012-ի ֆուտբոլի մրցաշարը գրեթե մոտեցել է իր հանգուցալուծմանը, և հենց այս փուլում որոշիչ գործոն դարձան պրոֆեսիոնալիզմը և խաղամակարդակը: Այս գործոնները ասիական թիմերի օգտին չէին, և վերջիններս իրավացիորեն զիջեցին իրենց մրցակիցներին: Երիտասարդական թիմերի մակարդակում խաղային կարգապահությունը և կազմակերպվածությունը կարևոր, բայց առաջնային դեր չեն խաղում, առավել մեծ է ակտիվ հարձակողական գործողությունների և անհատական տեխնիկայի դերը, որով աչքի ընկան ամերիկյան երկու մայրցամաքները ներկայացնող ֆուտբոլիստները: Կիսաեզրափակիչ փուլը ցույց տվեց ասիացիներին, որ իրենք դեռ շատ պետք է աշխատեն լուրջ արդյունքների համար, միևնույն ժամանակ հավելելով, որ մինչ այս գործադրած ջանքերը տվեցին իրենց արդյունքները` հնարավոր բրոնզե մեդալների տեսքով:

Ճապոնիա 1-3 Մեքսիկա
1-0` Օցու (12'), 1-1` Ֆաբիան (31'), 1-2` Պերալտա (65'), 1-3` Կորտես (90')

Կիսաեզրափակիչ այս հանդիպումը աչքի ընկավ առավել լարված ու հետաքրքիր պայքարով, քանի որ, ի տարբերություն մյուս մրցավեճի` այստեղ ակնհայտ ֆավորիտ չկար: Ճապոնացիները 12-րդ րոպեին անակնկալ կերպով առաջ անցան. հեռվից հուժկու հարվածով Օցուն գրավեց մեքսիկացիների դարպասը: Մեքսիկացիները ակտիվացան, և Դոս Սանթոսի երկու աններելի վրիպումներից հետո 31-րդ րոպեին Մարկո Ֆաբիանը անկյունայինի խաղարկումից հետո գլխով գնդակն ուղղեց դեպի դարպասը: Երկրորդ կեսի սկզբում ճապոնացիները սկսեցին ակտիվանալ, սակայն մեքսիկացիները ոչ միայն հաղթահարեցին ասիացիների ճնշումը, այլև կարողացան իրենք առաջ անցնել հաշվի մեջ: Օրիբե Պերալտան, խաղընկերոջ ջանքերով խլելով գնդակը մրցակցից, հեռու տարածությունից գեղեցիկ հարվածով առաջ մղեց իր թիմին: Ճապոնացիները նետվեցին հետ բերելու կորցրածը, սակայն մեքսիկացիների պաշտպանությունը առանձնապես սուր գործողությունների հնարավորություն չտվեց մրցակցին: Դրա փոխարեն, վերջին րոպեներին փոխարինման դուրս եկած Կորտեսը չհամակերպվեց այն մտքի հետ, որ իրեն դաշտ են դուրս բերել ընդամենը ժամանակ շահելու համար, և ներխուժելով ճապոնացիների տուգանային հրապարակ, վերջակետ դրեց հանդիպմանը: Եթե երկու թիմերից էլ հանենք հեռվից կատարած հարվածներով խփված անակնկալ գնդակները, կստանանք այն հաշիվը, որը արտացոլում է ուժերի իրական հարաբերակցությունը խաղադաշտում: Իսկ մեքսիկացիները շարունակում են աճել յուրաքանչյուր խաղի ընթացքում, և եզրափակիչին կներկայանան որպես արժանի մրցակիցներ ցանկացած թիմի: 

Բրազիլիա 3-0 Հարավային Կորեա
1-0` Ռոմուլո (38'), 2-0` Դամիաո (57'), 3-0` Դամիաո (64')

Հարավային Կորեայի հավաքականը, զրկելով ֆուտբոլային աշխարհին Բրազիլիա-Մեծ Բրիտանիա դիմակայությունից, փորձեց ինքնուրույն դեմ դուրս գալ բրազիլացիներին: Սակայն վերջիններս ասիացիներին հաղթահարեցին ինչպես հերթական մրցակցի` նույն երեք գնդակներով: Ընդ որում կորեացիները չկարողացան խփել ոչ մի պատասխան գնդակ: Բրազիլացիների ոչ լուրջ ճնշումը բերեց առաջին գոլը արդեն 38-րդ րոպեին: Երկրորդ կեսում կորեացիների որոշակի ակտիվացումը սկսեց անհանգստացնել բրազիլացիներին միայն այն ժամանակ, երբ մրցավարը չնշանակեց ակնհայտ 11 մետրանոցը իրենց դարպասին: Բրազիլացիները որոշեցին արագ փակել բոլոր հարցերը, իսկ կատարողի դերում Լեանդրո Դամիաոն էր: Նա իր երկու գոլերով բրազիլացիներին դուրս բերեց մրցաշարի եզրափակիչ, իսկ իրեն` ռմբարկուների ցուցակի առաջին հորիզոնական: Բրազիլիան եզրափակիչում կհանդիպի Մեքսիկային, և դա կլինի բրազիլացիների` այս մրցաշարում երևի թե ամենադժվար խաղը:

Օգոստոսի 10-ին ասիական թիմերը կորոշեն բրոնզե մեդալակրին, իսկ ահա ոսկու համար պայքարող Բրազիլիայի և Մեքսիկայի հավաքականներին լեգենդար "Ուեմբլին" կընդունի օգոստոսի 11-ին: Եզրափակիչում հետաքրքիր դիմակայությունը ապահովված է, քանի որ իրար դեմ են դուրս եկել արագ ու հարուստ տեխնիկական արսենալով զինված բրազիլացիները և կրակոտ ու տոկուն մեքսիկացիները, որոնցից ամեն ինչի կարելի է սպասել:

Read more »

Լոնդոն-2012. Ֆուտբոլի մրցաշարի քառորդ եզրափակիչ փուլի տեսություն

Մեծ Բրիտանիայի ժառանգությունը Անգլիայի հավաքականից, բրազիլացիների դժվարին հաղթանակը` նույն 3 գոլերով, Սենեգալի արժանի հրաժեշտը մրցաշարին, ինչպես նաև ձևավորված ասիաամերիկյան կիսաեզրափակիչ զույգերը` օլիմպիական խաղերի ֆուտբոլի մրցաշարի քառորդ եզրափակիչ փուլի մեր տեսությունում:

Օլիմպիական ֆուտբոլի քառորդ եզրափակիչ փուլն առանձնացավ շատ հետաքրքիր ու դրամատիկ դիմակայություններով: Հանդիպումները շատ դիտարժան ստացվեցին, առանձնացան անակնկալ զարգացումներով և անձնվեր պայքարով, և այս ամենն ընթացավ հարձակողական ֆուտբոլի ֆոնի վրա: Թիմերը ոչ մի պահ չէին վարանում գրոհի նետվել, և ներկայումս բազմաթիվ պրոֆեսիոնալ ֆուտբոլային մրցաշարերում առկա պրագմատիզմն ու փակ պաշտպանողական խաղը հեռու էր բրիտանական մարզադաշտերից, ինչը, միանշանակ, ամենալավ նվերն է ֆուտբոլային երկրպագուների համար: Իսկ առավել լավ նվեր իրենց երկրպագուներին մատուցեցին Ճապոնիայի, Մեքսիկայի, Բրազիլիայի և Հարավային Կորեայի հավաքականները, որոնցից երեքը տուն կվերադառնան օլիմպիական մեդալներով: 

Ճապոնիա 3-0 Եգիպտոս

1-0` Նագայի (14'), 2-0` Յոսիդա (78'), 3-0` Օցու (83')

Ճապոնիան այս խաղում հաստատեց իր համեմատաբար բարձր կարգը և լուրջ պատրաստվածությունը, որի շնորհիվ հայտնվել էր քառորդ եզրափակիչում: Խփելով արագ գնդակ` ճապոնացիները ետ քաշվեցին և զիջեցին գնդակը եգիպտացիներին, որոնց պարբերաբար հաջողվում էր լարվածություն ստեղծել մրցակցի դարպասի մոտ: Սակայն եգիպտացիների ցրված ու անկազմակերպ խաղը պաշտպանությունում թույլ տվեց ճապոնացիներին 41-րդ րոպեին շատ արագ ու վտանգավոր հակագրոհ կազմակերպել, որի արդյունքում եգիպտացիների պաշտպան Սամիր Սաադը վերջին հույսի խախտման համար արժանացավ կարմիր քարտի: Հենց այս պահն էլ որոշիչ դարձավ խաղում: Եգիպտացիները երկրորդ կեսում էլ ստիպված էին գրոհել, իսկ ազատ տարածքները պաշտպանությունում աննկատ չմնացին ճապոնացիների կողմից: Խաղի վերջում արդեն նրանք ավելացրեցին իրենց առավելությունը ևս երկու գոլերով և վստահորեն դուրս եկան կիզաեզրափակիչ:

Մեքսիկա 4-2 Սենեգալ

1-0` Էնրիկես (10'), 2-0` Ակինո (63'), 2-1` Կոնատե (69'), 2-2` Բալդե (76'), 3-2` Դոս Սանթոս (98'), 4-2` Էրերա (109')

Կիսաեզրափակիչ երկրորդ հանդիպումը առավել վառ ու դրամատիկ ստացվեց: Մեքսիկայի աշխույժ ու աշխատասեր, միևնույն ժամանակ բավականին հասուն ֆուտբոլային կոլեկտիվին դեմ էր դուրս եկել տիպիկ աֆրիկական, աթլետիկ և մարտնչող Սենեգալի հավաքականը: Երկու թիմերն էլ շատ լավ էին դրսևորել իրենց խմբային փուլում` միաժամանակ ցույց տալով, որ իրենք դեռ ավելիին են ունակ: Չբացահայտված այդ ներուժի մի մասը ի ցույց դրվեց այս խաղում` դարձնելով այն մրցաշարի լավագույն դիմակայություններից մեկը: Առաջինը աչքի ընկան մեքսիկացիները. ստանդարտի խաղարկումից հետո Էնրիկեսը գլխով վարպետորեն շեղեց գնդակի ուղղությունը դեպի մրցակցի դարպասը: Սենեգալցիները տիրեցին խաղին և պարբերաբար սպառնում էին մեքսիկացիների դարպասին, սակայն արդյունավետ եզրափակումը բացակայում էր: Երկրորդ կեսում մեքսիկացիները կրկնապատկեցին հաշիվը, որից հետո միայն աֆրիկյան հարձակումը սկսեց պտուղներ տալ: Արդեն 76-րդ րոպեին հաշիվը հավասար էր, ընդ որում երկու գոլերից մեկը իր հաշվին գրանցեց մրցաշարի լավագույն ռմբարկուի հավակնորդներից մեկը` Մուսա Կոնատեն: Խաղը գնաց ավելացրած ժամանակ: Այստեղ առավել ուշադիր գտնվեցին մեքսիկացիները, ովքեր երկու անգամ վարպետորեն օգտագործեցին սենեգալցի պաշտպանների անիմաստ վրիպումները:  Սենեգալը, ինչպես ամբողջ խաղում գրոհել էր, այդպես էլ շարունակեց ողջ ավելացրած ժամանակում` ավարտելով մրցաշարը որպես մրցաշարի ամենահետաքրքիր, ամենապայքարող և կոլորիտային թիմերից մեկը: Իսկ իրենց ոչ պակաս կոլորիտային մրցակիցը կխաղա արդեն կիսաեզրափակիչում` ճապոնացիների դեմ:

Բրազիլիա 3-2 Հոնդուրաս

0-1` Մարտինես (12'), 1-1` Դամիաո (38'), 1-2` Էսպինոսա (48'), 2-2` Նեյմար (50', 11 մետր.), 3-2` Դամիաո (60')

Բրազիլացիները, խփելով արդեն ավանդույթ դարձած երեք գնդակները, հերթական հաղթանակը տարան, բայց առաջին անգամ մրցաշարում լուրջ խնդիրների առաջ կանգնեցին: Ինչպես նշել էինք մեր նախորդ տեսությունում, շատ հետաքրքիր կլինի տեսնել բրազիլացիների խաղը առավել ուժեղ մրցակիցների դեմ, և Հոնդուրասը անսպասելիորեն հանդես եկավ հենց այդ ուժեղ մրցակցի դերում: Այստեղ արդեն բրազիլացիների շքեղ և վստահ խաղը խամրեց, հատկապես հոնդուրասցիների առաջին գոլից հետո: Բրազիլացիները գործում էին ցրված և անկազմակերպ, ինչ-որ մտածված գործողություններ չէին նկատվում: Միայն հոնդուրասցի Վիլմերի հեռացումից հետո բրազիլացիները որոշակիորեն հանգստացան և կարողացան հավասարեցնել հաշիվը, սակայն երկրորդ կեսում հոնդուրասցիները նոր անակնկալ էին պատրաստել. Էսպինոսան դիպուկ հարվածով առաջ մղեց իր թիմին: Բրազիլացիները վերջապես ինչ-որ սրություն մտցրեցին և արագ հավասարեցրեցին հաշիվը Նեյմարի 11 մետրանոցի շնորհիվ: Խաղի հետագա ընթացքը դարձավ բավականին անհետաքրքիր, քանի որ բրազիլացիների առավելությունը աստիճանաբար ակնհայտ էր դառնում: Արդյունքում բրազիլացիները 70-րդ րոպեին առաջ անցան Դամիաոյի գոլի շնորհիվ և հաղթանակ տարան, սակայն պետք է նշել, որ այս հաղթանակը նրանց տրվեց ոչ թե թիմային ֆուտբոլի, այլ առանձին ֆուտբոլիստների բարձր կարգի հաշվին: Իսկ Հոնդուրասը իրեն դրսևորեց որպես բավականին պինդ մրցակից, որին պակասեց ընդամենը մի քիչ փորձ և հաջողություն:

Մեծ Բրիտանիա 1-1 Հարավային Կորեա (11 մետրանոցներով` 4-5)

0-1` Չժի (29'), 1-1` Ռեմսի (36', 11 մետր.)

Կարդիֆի «Միլենիում Արենան» կրկին ընդունում էր Միացյալ Թագավորության հավաքականին` քառորդ եզրափակիչի` Հարավային Կորեայի դեմ խաղում, և կրկին ուելսցիները բախտ չունեցան առաջին րոպեներից դաշտում տեսնելու իրենց առաջատար Գիգզին: Վերջինս դաշտում հայտնվեց խաղի վերջում միայն` առաջնորդելու իր թիմին ավելացրած ժամանակում, իսկ հետո նաև` 11 մետրանոց հարվածաշարում: Սակայն ինչ աներ Գիգզը, եթե 11 մետրանոցներում ձախողվելու սովորությունը Մեծ Բրիտանիայի հավաքականը ժառանգել էր Անգլիայի հավաքականից: Ամեն դեպքում, շատերը կհամաձայնեն, որ բրիտանացիները պետք է ամեն ինչ ավարտեին 90 րոպեների ընթացքում, մանավանդ, որ դրա հնարավորությունը ունեին: Խաղի ընթացքում բրիտանացիների վաստակած երկու 11 մետրանոցներից Աարոն Ռեմսին իրացրեց ընդամենը մեկը` դառնալով խաղի անհաջողակներից մեկը: Նրան մենակ չթողեց Դանիել Ստարիջը, ով վրիպեց որոշիչ 11 մետրանոց հարվածի ժամանակ: Իսկ հարավկորեացի ֆուտբոլիստները դիպուկ իրացրեցին բոլոր հինգ հարվածները` այնպես, ինչպես դիպուկ են իրենց հայրենակից նետաձիգները և հրաձիգները այս օլիմպիադայում: Արդյունքում Հարավային Կորեան դուրս է գալիս կիսաեզրափակիչ, որտեղ նրան սպասում է Բրազիլիան: Իսկ բրիտանացիներին մնում է լավագույն հիշողությունները պահել այս հավաքականից, քանի որ գուցե և այն վերջինը լինի այս ձևաչափով: 

Կիսաեզրափակիչ փուլ (7 օգոստոս)

Մեքսիկա - Ճապոնիա

Հարավային Կորեա - Բրազիլիա

Կիսաեզրափակիչում ձևավորվել են ասիաամերիկյան երկու զույգեր: Խաղային առումով ամերիկյան թիմերը որոշակի առավելություն ունեն, սակայն մյուս կողմից էլ ասիական երկու թիմերը ողջ մրցաշարի ընթացքում դրսևորեցին իրենց որպես լուրջ պատրաստված և կազմակերպված կոլեկտիվներ: Ինչևէ, մեդալների համար պայքարը առջևում է, և հույս ունենանք, որ կիսաեզրափակիչում ևս կտեսնենք կրակոտ ու դիտարժան ֆուտբոլ:

Read more »

Ֆուտբոլն Օլիմպիական խաղերում. Մաս-1` Բրազիլիայի հավաքական

Եվրոպայի առաջնության կրքերն արդեն վաղուց հանդարտվել են, և ֆուտբոլային աշխարհում տարվա այս հատվածում տիրում է առավելապես ոչ ֆուտբոլային աղմուկը` կապված ֆուտբոլիստների առքուվաճառքի և տրանսֆերային խոշոր գումարների հետ: Այս «բարդ» շրջանում Լոնդոնը հավակնում է իր կողմը թեքել ֆուտբոլասերների` կարոտով լի հայացքները` օլիմպիական ֆուտբոլի կիսաֆուտբոլային-կիսասպորտային մրցաշարով:

Ֆուտբոլն օլիմպիական մարզաձև է դարձել արդեն երկրորդ օլիմպիական խաղերից` 1900թ., իսկ 1996թ. Ատլանտայի օլիմպիական խաղերում մեկնարկ է ստացել նաև կանանց ֆուտբոլի մրցաշարը:

Այս խաղերին մասնակցելու են 16 տղամարդկանց և 12 կանանց թիմեր` 18-ական խաղացողներով: Տղամարդկանց հավաքականներում ֆուտբոլիստների տարիքը չի կարող գերազանցել 23 տարեկանը, բացառությամբ 3 խաղացողների, իսկ ահա կանանց հավաքականներում սահմանափակումներ չկան: Տղամարդկանց 4 և կանանց 3 խմբերից 8-ական թիմեր դուրս կգան փլեյ-օֆֆ փուլ և օլիմպիական մրցակարգով կորոշեն ուժեղագույններին: Մրցաշարերը տեղի կունենան հուլիսի 25-ից մինչև օգոստոսի 11-ը` Մեծ Բրիտանիայի 6 քաղաքների մարզադաշտերում`  «Սիթի օֆ Քովենթրի սթադիում» մարզադաշտ` Քովենթրի, «Հեմփդեն Փարկ»` Գլազգո, «Միլլենիում Ստադիում»` Քարդիֆ, «Օլդ Թրաֆֆորդ»` Մանչեսթր, «Սենթ Ջեյմս Փարկ»` Նյուքասլ և «Ուեմբլի Սթադիում»` Լոնդոն: 

«Գոլիզեում» բլոգը կանդրադառնա օլիմպիական ֆուտբոլին մրցաշարի ողջ ընթացքում, իսկ մինչ այդ ներկայացնում ենք մրցաշարի հիմնական հավակնորդներին: Այսպիսով, տղամարդկանց մրցաշար, Բրազիլիայի հավաքական.

Պատմություն. 

Բրազիլիայի հավաքականի ֆուտբոլային տիտղոսների ցանկը ամենահարուստներից մեկն է ֆուտբոլային աշխարհում, բայց ահա օլիմպիական խաղերում, ինչքան էլ որ զարմանալի է, բրազիլացիները դեռ ոսկե մեդալ չեն վաստակել: Երկու անգամ «պենտակամպիոնները» բավարարվել են արծաթե մեդալներով` 1984-ին և 1988-ին, նույնքան անգամ էլ բրոնզե մեդալներով` 1996-ին և 2008-ին: Այս խաղերին բրազիլացիների տրամադրվածությունը էականորեն այլ կլինի, քանի որ բրազիլացիները պատրաստվում են ընդունելու Աշխարհի առաջնությունը 2014թ-ին, և մինչ այդ պետք է վերահաստատել ֆուտբոլային գերտերության իրենց դիրքերը: Բացի այդ, սա հիանալի հնարավորություն է երիտասարդ կազմի համար` թե լավ խաղ ցույց տալու և հետագայում ազգային հավաքականում ընդգրկվելու, և թե բրազիլացիների փառահեղ հավաքածուին միակ պակասող տիտղոսը լրացնելու համար:

Նեյմարը և Պատոն` բրազիլացիների հարձակողական զույգը

Մարզիչը` Մանո Մենեզես: Մենեզեսը գլխավորում է Բրազիլիայի ազգային հավաքականը, և օլիմպիական հավաքականի համար նոր մարզիչ գտնելու կարիք չկար: Մենեզեսը որպես ֆուտբոլիստ լուրջ արդյունքներ չի ունեցել, խաղացել է բրազիլական երկրորդ դիվիզիոնում, իսկ ահա որպես մարզիչ հայտնի է դարձել 2003թ.-ին, երբ համեստ «Կամպու-Բոն» թիմին հասցրել է Բրազիլիայի գավաթի կիսաեզրափակիչ: Այնուհետև մարզել է «Գրեմիո» և «Կորինտիանս» ակումբները, վերջինիս հետ նվաճելով Բրազիլիայի գավաթը և Սան Պաոլո նահանգի առաջնությունը: 2010թ.-ից մարզում է Բրազիլիայի հավաքականը: Առաջին խոշոր մրցաշարը Մենեզեսը ձախողեց. դա Ամերիկայի գավաթն էր, որտեղ բրազիլացիները պայքարը լքեցին դեռ 1/4 եզրափակիչում` 11 մետրանոցներով զիջելով Պարագվայի ընտրանուն: Չնայած անփառունակ ելույթին, մարզիչը խաղից հետո համոզմունք էր հայտնել, որ Բրազիլիայի հավաքականը ճիշտ ուղու վրա է և նրանք շարունակելու են աշխատել նույն ոճով: Ահա և բավականին լավ հնարավորություն մարզչի համար` տեր կանգնելու մեկ տարի առաջ իր հնչեցրած խոսքերին:

Մանո Մենեզես

Կազմը.
Դարպասապահներ` Ռաֆաել Քաբրալ (Սանթոս), Նետո (Ֆիորենտինա), 

Պաշտպաններ` Մարսելո (Ռեալ), Ռաֆայել դա Սիլվա (Մանչեսթր Յունայթեդ), Դանիլո (Պորտո), Ալեքս Սանդրո (Պորտո), Տիագո Սիլվա (ՊՍԺ), Ժուան (Ինտեր), Բրունո Ուվինի (Սան Պաոլո), 

Կիսապաշտպաններ` Ռոմուլո (Վասկո դա Գամա), Գանսու (Սանթոս), Օսկար (Ինտերնասիոնալ), Սանդրո (Տոտենհեմ), Լուկաս (Սան Պաոլո), 

Հարձակվողներ` Նեյմար (Սանթոս), Ալեքսանդր Պատո (Միլան), Լեանդրո Դամիաո 

23 տարեկանից բարձր երեք ֆուտբոլիստներն են Մարսելոն, Տիագո Սիլվան և Հալկը: Ինչպես տեսնում ենք, մարզիչ Մանո Մենեզեսը փորձառու խաղացողներին օգտագործել է հատկապես պաշտպանությունը ուժեղացնելու համար: Պաշտպանական խնդիրները ակնհայտ են դարձել հավաքականի վերջին երկու ընկերական խաղերից հետո, որոնցում բրազիլացիները պարտություն են կրել և ընդունել ընդհանուր հաշվարկով 6 գնդակ են ընդունել: Իսկ հարձակման գծում Մենեզեսը ընդգծել է 25-ամյա Հալկի կարևորությունը, որի փորձը և որոշումներ կայացնելու կարողությունը չափազանց անհրաժեշտ են թիմին:

Առանց փորձառուների էլ Բրազիլիայի հավաքականը հնչեղ անունների պակաս չունի: Պատոն, Ռաֆայելը, Ժուանը վաղուց ծանոթ են եվրոպացի երկրպագուներին, իսկ Գանսոյի և Նեյմարի մասին խոսակցությունները լսելի են նաև օվկիանոսից այս կողմ: Այս աստղային կազմը դաշտում առաջնորդելու է 27-ամյա «վետերան» Տիագո Սիլվան:

Հալկը` բրազիլացիների առաջատարներից մեկը

Մարտավարություն: Մենեզեսի «Սելեսաոն» հիմնականում խաղում է 4-2-3-1 մարտավարությամբ: Պաշտպանների քառյակի առջևում գործում են երկու կիսապաշտպաններ, որոնք ապահովագրում են պաշտպանական գործողությունները և սկսում են գրոհները: Առջևում երեք հարձակողական ոճի կիսապաշտպաններն են, ովքեր տարբեր կողմերից «շրջապատում» են միակ կենտրոնական հարձակվողին: 

Բրազիլացիների հնարավոր կազմը

Մրցակիցներ: Բրազիլիայի հավաքականը ընդգրկված է C խմբում, որտեղ նրա մրցակիցներն են Եգիպտոսի, Նոր Զելանդիայի և Բելառուսի հավաքականները: Հուլիսի 26-ին պենտակամպիոնները կմրցեն Եգիպտոսի, 29-ին` Բելառուսի, իսկ օգոստոսի 1-ին` Նոր Զելանդիայի դեմ: Խմբային փուլը հաղթահարելու դեպքում «Սելեսաոն» կհանդիպի D խմբի թիմերից մեկի հետ, իսկ այնտեղ ընդգրկված են Իսպանիայի, Ճապոնիայի, Հոնդուրասի և Մարոկկոյի հավաքականները:

Բրազիլացի երկրպագուները

Անկախ մրցակիցներից` բրազիլացիները համարվում գլխավոր հավակնորդներից մեկը, ինչպես նաև օլիմպիական ֆուտբոլի մրցաշարում երկրպագուների ֆուտբոլային ծարավի հագեցման գլխավոր հույսը: Բոլորն են կարոտել բրազիլական խելահեղ ֆուտբոլը, և հենց Լոնդոնը կարող է դառնալ այդ ֆուտբոլի թատերաբեմը, քանզի մրցաշարը ամեն դեպքում պաշտոնական չի համարվում և կարելի է ուղղակիորեն խաղալ երկրպագուների համար: 

Read more »